Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 929 Hüküm no: 767 Orijinal metin no: [173b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeyneb’in müteveffa babası Mahmud Efendi’nin kendisine evin bir kısmını hibe ettiğini ispat ettiği Mahmiye-i İstanbul’da Emin Nureddin mahallesi ahâlîsinden olup Davudpaşa müderrisi iken bundan akdem vefât eden merhûm Mahmud Efendi b. Hasan’ın verâseti zevce-i menkûha-i metrûkesi Safiye Hatun bt. Ahmed Efendi ile sagīre kızı Zeyneb’e münhasıra oldukdan sonra sagīre-i mezbûrenin tesviye-i umûruna li-ecli’d-da‘vâ vasî nasb olunan bâ‘isü’l-kitâb İbrahim Efendi b. Yusuf mahfil-i kazâda müteveffâ-yı mezbûrun zevce-i menkûha-i metrûkesi olup zâtı ta‘rîf-i şer‘î ile mu‘arrefe olmağla terekesine bi’l-verâse vaz‘-ı yed eden mezbûre Safiye Hatun mahzarında bi’l-vesâye üzerine da‘vâ ve takrîr-i kelâm edip müteveffâ-yı mezbûr Mahmud Efendi b. Hasan fevtinden iki sene mukaddem hâl-i kemâl-i sıhhatinde silk-i mülkünde olup mahalle-i mezbûrede vâki‘ arsasının merhûme Kamer Hatun Vakfı’na senede yedi yüz yirmi akçe icâresi ve binâsı mülkü olan bir tarafdan el-Hâc Yusuf mülkü ve bir tarafdan Odabaşı Hatunu mülkü ve iki tarafdan tarîk-i âmma müntehî hâriciye ve dâhiliyede büyût-ı adîdeyi müştemil mülk menzilinin müfrez ve mu‘ayyen olan hâriciyesini kızı sagīre-i mezbûreye hîbe-i sahîha-i şer‘iyye ile hîbe ve temlîk ve velâyeten kabz eylediğini ikrâr ve işhâd ve i‘lân edip fevt oldukda hâriciye-i menzil-i mahdûd-ı mezbûr sagīre-i mezbûrenin mülk-i mevhûbu olmuş iken zevcesi mezbûre Safiye Hatun hâriciye-i mezkûra müteveffâ-yı mezbûrun terekesinden olmak üzere ta‘arruz eder suâl olunup men‘ olunmak matlûbumdur dedikde gıbbe’s-suâl ve’l-inkâr vasiyy-i mezbûrdan sıdk-ı makāline beyyine taleb olundukda udûl-ı ahrâr-ı ricâl-i Müslimînden mahalle-i mezbûre sükkânından el-Hâc Osman Ağa b. el-Hâc İbrahim ve Sekbanbaşı İbrahim Ağa mahallesi sükkânından Mehmed Efendi b. Halil li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffâ-yı mezbûr Mahmud Efendi b. Hasan fevtinden iki sene mukaddem hâl-i kemâl-i sıhhatinde silk-i mülkünde olup mahalle-i mezbûrede vâki‘ arsasının merhûme Kamer Hatun Vakfı’na senede yedi yüz yirmi akçe icâresi ve binâsı mülkü olan bir tarafdan el-Hâc Yusuf mülkü ve bir tarafdan Odabaşı Hatunu mülkü ve iki tarafdan tarîk-i âmma müntehî hâriciye ve dâhiliyede büyût-ı adîdeyi müştemil mülk menzilinin müfrez ve mu‘ayyen olan hâriciyesini kızı sagīre-i mezbûre Zeyneb’e hîbe-i sahîha-i şer‘iyye ile hîbe ve temlîk ve velâyeten kabz eylediğini huzûrumuzda ikrâr ve i‘lân ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye eyledikde gıbbe ri‘âyeti şerâiti’l-kabûl şehâdetleri makbûle olmağın mûcebiyle ba‘de’l-hükm mâ-vaka‘a kayd-şüd. Fî gurreti Receb sene 1110 Şuhûdü’l-hâl: Eş-şâhidûnü’s-sâbikūn.