Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 935 Hüküm no: 771 Orijinal metin no: [174b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa’nın vefat eden kardeşi Usta Halil’in mirasındaki hissesini aldığı Husûs-ı âti’l-beyânın mahallinde ketb ü tahrîri iltimâs olunmağın kıbel-i şer‘-i şerîfden me’zûnen Mevlânâ Mehmed Rûşenî Efendi irsâl olunup ol dahi mahmiye-i İstanbul’da Sekbanbaşı Yakub Ağa mahallesinde sâkin iken bundan akdem vefât eden Yaycı Usta Halil b. Ahmed’in menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf eyledikde müteveffâ-yı mezbûrun verâseti zevce-i menkûha-i metrûkesi Râbia Hatun bt. el-Hâc Hasan ile kebîre kızı Emetullah ve li-ebeyven er karındaşı Mustafa ile kız karındaşı Âişe’ye münhasıra olduğu şer‘an zâhir ve mütebeyyin oldukdan sonra müteveffâ-yı mezbûrun er karındaşı mezbûr Mustafa meclis-i ma‘kūd-ı mezbûrda müteveffâ-yı mezbûrun vesâyâsını tenfîze vasiyy-i muhtârı olmağla terekesine bi’l-vesâye vaz‘-ı yed eden bâ‘isü’l-kitâb dâmadı Süleyman Beşe b. Bayram muvâcehesinde ikrâr ve takrîr-i kelâm edip karındaşım mezbûr Usta Halil vefât edip terekesi tahrîr ve taksîm olundukda ber-mûceb-i defter-i kassâm-ı askerî ba‘de’l-ihrâcât para üçer akçeye olmak üzere benim hisseme isâbet eden iki bin yirmi sekiz akçeyi tereke-i müteveffâ-yı mezbûrdan olmak üzere vasiyy-i mezbûr Süleyman Beşe yedinden bi’t-tamâm ve’l-kemâl alıp kabz eyledim meblağ-ı mezkûr iki bin yirmi sekiz akçeden mezbûr Süleyman Beşe yedinde bir akçe ve bir habbe hakkım kalmayıp karındaşım müteveffâ-yı mezbûrun mîrâsına müte‘allık eğer câriye ve eğer sermâye ve sâir âmme-i mîrâs da‘vâsından vasiyy-i mezbûr Süleyman Beşe’nin ve zevcesi mezbûre Emetullah’ın zimmetlerini ibrâ-i âmm-ı katı‘u’n-nizâ‘la ibrâ ve iskāt eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an irsâl olunan Mehmed Beşe b. Hüseyin ve Molla İsmail b. Zülfikâr ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd-şüd. Fî 14 min-Recebi’l-ferd sene 1110 Şuhûdü’l-hâl: el-Hâc Nebi b. el-Hâc Ali, İmâm Hasan Efendi b. el-Hâc Yusuf, Abdulkadir Ağa b. Nuh, Ahmed Beşe b. Kubad?, es-Seyyid Osman Çelebi b. es-Seyyid Mustafa, İbrahim Çelebi b. el-Hâc Mehmed, Ebubekir b. Ali, Hüseyin Bey b. İsmail, Hasan Bey b. Şa‘bân, el-Hâc Ömer b. Osman, el-Hâc Ebubekir b. Mehmed.