Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 935 Hüküm no: 772 Orijinal metin no: [175a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Usta Halil’in Rus asıllı cariyesi Gülistan’ı kızı Emetullah’a hibe etmiş olduğu Kezâlik Akd-i meclis-i şer‘-i şerîf ettikde müteveffâ-yı mezbûrun verâseti zevce-i menkûha-i metrûkesi Râbia Hatun bt. el-Hâc Hasan ile sulbiye kebîre kızı Emetullah’a ve li-ebeveyn er karındaşı Mustafa ve kız karındaşı Âişe’ye münhasıra olduğu şer‘an zâhir ve mütebeyyin oldukdan sonra karındaşı mezbûr Mustafa meclis-i ma‘kūd-ı mezbûrda kebîre kızı mezbûre Emetullah tarafından husûs-ı âti’l-beyânda vekîl olduğu zât-ı mezbûreyi ma‘rifet-i şer‘iyye ile ârifân mahalle-i mezbûre sükkânından Hasan Efendi b. el-Hâc Yusuf ve Mehmed Çelebi b. Mehmed şehâdetleri ile mahzar-ı hasm-ı câhidde sâbit ve sübût-ı vekâletine hükm-i şer‘î lâhık olan bâ‘isü’l-kitâb el-Hâc Ömer b. Osman mahzarında üzerine da‘vâ ve takrîr-i kelâm edip müteveffâ-yı mezbûr Yaycı Usta Halil b. Ahmed’in terekesinde mevcûde işbu Rusiyyetü’l-asl Gülistan bt. Abdullah nâm câriye müteveffâ-yı mezbûrun mülk ve hakkı iken kızı müvekkile-i mezbûre bi-gayr-ı hakkın vaz‘-ı yed ve mîrâsa idhâlden imtinâ‘ eder suâl olunsun dedikde gıbbe’s-suâl vekîl-i mezbûr cevâbında müteveffâ-yı mezbûr Usta Halil b. Ahmed fevtinden bir sene mukaddem hâl-i kemâl-i sıhhatinde mülkünde olan Rusiyyetü’l-asl mezbûre Gülistan bt. Abdullah’ı kızı müvekkile-i mezbûre Emetullah’a hîbe-i sahîha-i şer‘iyye ile hîbe ve temlîk ve teslîm ol dahi meclis-i hîbede ittihâb ve temellük ve kabz u kabûl etmekle mülk-i mevhûbu olmuşdur deyü def‘le mukābele ve istintâk olunsun dedikde gıbbe’l-istintâk ve’l-inkâr vekîl-i mezbûrdan sıdk-ı makāline beyyine taleb olundukda udûl-ı ahrâr-ı ricâl-i Müslimînden Kalenderhane mahallesinde sâkin fahrü’l-eşbâh Abdulkadir Ağa b. Nuh ve mezbûr Hasan Efendi b. el-Hâc Yusuf ve Mehmed Çelebi b. Mahmud li-ecli’ş-şehâde meclis-i ma‘kūd-ı mezbûrda hâzırûn olup istişhâd olunduklarında fi’l-hakīka müteveffâ-yı mezbûr Usta Halil b. Ahmed fevtinden bir sene mukaddem hâl-i kemâl-i sıhhatinde mülkünde olan işbu Rusiyyetü’l-asl Gülistan bt. Abdullah nâm câriyesini kızı müvekkile-i mezbûre Emetullah’a bizim huzûrumuzda hîbe-i sahîha-i şer‘iyye ile hîbe ve teslîm ve temlîk ol dahi meclis-i hîbede ittihâb ve temellük ve kabz u kabûl eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye eyledikde gıbbe ri‘âyeti şerâiti’l-kabûl şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan Mehmed Beşe b. Hüseyin ve Molla İsmail b. Zülfikâr ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd-şüd. Fî 14(?) min-Recebi’l-ferd sene 1110 Şuhûdü’l-hâl: Eş-şâhidûnü’s-sâbikūn.