Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 936 Hüküm no: 773 Orijinal metin no: [175a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Abdülkerim ile çocuklarının varislerinin miras hisselerini alıp zimmetlerini ibra ettikleri Husûs-ı âti’l-beyânın mahallinde tahrîri içün savb-ı şer‘den irsâl olunan Yahya Efendi b. merhûm Mustafa Efendi mahmiye-i İstanbul’da Esirci Kemâl mahallesinde Ümmühani bt. el-Hâc Mustafa’nın menziline varıp akd-i meclis-i şer‘-i şerîf ettikde mahmiye-i mezbûrede Süleymaniye mahallesinde fevt olan merhûm el-Hâc Abdülkerim b. Musa’nın sulbî oğlu olup kendiden sonra vefât eden Musa Çelebi’nin min-kıbeli’l-ümm cedde-i sahîhası olup zâtı Ali Efendi b. Ahmed ve Ahmed Çelebi b. İbrahim ta‘rîfleriyle mu‘arrefe olan mezbûre Ümmühani Hatun meclis-i ma‘kūd-ı mezbûrda müteveffâ-yı evvel-i mezbûr el-Hâc Abdülkerim’in evlâd-ı sıgārının vasiyy-i mansûbları olmağla terekesine vaz‘-ı yed eden bâ‘isü’l-kitâb Ali Çelebi b. el-Hâc Yahya mahzarında ikrâr ve takrîr-i kelâm edip müteveffâ-yı mezbûr Musa Çelebi’nin ber-mûceb-i defter mal-ı müntakili ile zimem-i nâsdan me’hûz sekiz yüz elli guruşdan benim südüs hisse-i şer‘iyyem olan seksen guruşu mezbûr Ali Çelebi yedinden tamâmen alıp kabz edip beynimizde ma‘lûm emlâkden mâ‘adâ hisseme isâbet eden mîrâsa müte‘allık âmme-i da‘vâdan mezbûr Ali Çelebi’nin zimmetini ibrâ eyledim dedikde gıbbe’t-tasdîk müteveffâ-yı evvel-i mezbûr el-Hâc Abdülkerim’in zevce-i menkûhası olup zâtı mu‘arrifân-ı mezbûrân ta‘rîfleriyle mu‘arrefe olan Hamide Hatun bt. Abdullah meclis-i mezbûrda mezbûr Ali Çelebi mahzarında ikrâr ve takrîr-i kelâm edip zevcim müteveffâ-yı mezbûr zimmetinde mütekarrir ve ma‘kūdun-aleyh olan yirmi beş guruş mehr-i müeccelim ile zevcim müteveffâ-yı mezbûrun terekesinden ber-mûceb-i defter sümün hisse-i şer‘iyyem ile zimem-i mezbûrdan ve kızım Ümmügülsüm nâm müteveffâtdan südüs hissem olan cem‘an yüz yetmiş guruş hakkımı mezbûr Ali Çelebi yedinden bi’t-tamâm alıp kabz edip beynimizde ma‘lûm menzil hissesinden mâ‘adâ terekeye müte‘allık âmme-i de‘âvî ve mutâlebât ve eymân [ve] muhâsamâtdan mezbûr Ali Çelebi’nin zimmetini ibrâ ve iskāt eyledim dedikde gıbbe’t-tasdîkı’ş-şer‘î müteveffâ-yı mezbûr el-Hâc Abdülkerim’in sagīre kızı olup kendiden sonra fevt olan Hadîce’nin vâlidesi olup zâtı mu‘arrifân-ı mezbûrân ta‘rîfleriyle mu‘arrefe olan Vildan Hatun bt. Abdullah meclis-i mezbûrda mezbûr Ali Çelebi mahzarında ikrâr edip kızım sagīre-i mezbûreye babası müteveffâ-yı mezbûrdan zimem-i nâsdan me’hûz meblağdan sekiz yüz altı guruşdan hissesi olan meblağdan benim südüs hisseme isâbet eden yirmi dokuz buçuk guruş hakkımı mezbûr Ali Çelebi yedinden alıp kabz edip beynimizde ma‘lûm menzil hissesinden mâ‘adâ terekeden hisseme isâbet eden mîrâsa müte‘allık âmme-i da‘vâdan mezbûr Ali Çelebi’nin zimmetini ibrâ ve iskāt eyledim dedikde gıbbe’t-tasdîk müteveffâ-yı mezbûr el-Hâc Abdülkerim’in sulbiye kebîre kızı ve mezbûre Ali Çelebi’nin zevcesi olup zâtı mu‘arrifân-ı mezbûrân ta‘rîfleriyle mu‘arrefe olan Âişe Hatun meclis-i ma‘kūd-ı mezbûrda Ali Çelebi mahzarında ikrâr ve takrîr-i kelâm edip [175b] babam müteveffâ-yı mezbûrun terekesinden ve müte‘âkiben fevt olan karındaşlarım Hadîce ve Ümmügülsüm ve Musa Çelebi hisselerinden ber-mûceb-i defter hisse-i şer‘iyyem ile zimem-i mezbûrdan hissem olan cem‘an bin iki yüz elli guruş hakkımı zevcim mezbûr yedinden alıp kabz edip emlâkden mâ‘adâ hisseme isâbet eden mîrâs da‘vâsından zimmetini ibrâ ve iskāt eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ba‘dehû İbrahim b. Mehmed ile meclis-i şer‘a gelip alâ-vukū‘ihi takrîr etmeğin mâ-vaka‘a kayd-şüd. Fî gurreti Cumâdelâhire sene 1110 Şuhûdü’l-hâl: Osman Çelebi b. Abdullah, el-Hâc Mustafa b. Ramazan, el-Hâc Mehmed Efendi el-İmâm, el-Hâc Ömer b. Ali, el-Hâc Abdüllatif b. Ahmed.