Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 946 Hüküm no: 779 Orijinal metin no: [177a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Celeb Mehmed Ağa vefat eden Boğazhisarı Dizdarı İsmail Ağa’nın varisi olduğunu ispat ettiği Mahrûse-i Galata muzâfâtından Fındıklı kasabası mahallâtından Yahya Çelebi mahallesi ahâlîsinden müteveffâ-yı âti’z-zikrin li-ebeveyn karındaşı ve usûbet-i nesebiye cihetinden vârisi olduğunu iddi‘â eden hâfızü’l-kitâb Celeb Mehmed Ağa b. Şükrullah mahfil-i kazâda fi’l-asl mahalle-i mezbûre ahâlîsinden olup Boğazhisarı dizdârı iken bundan akdem vefât eden İsmail Ağa b. Şükrullah’ın li-ebeveyn ammi oğulları ve usûbet-i nesebiye cihetinden vârisleri olmak üzere terekesine vaz‘-ı yed eden Saray-ı atîk-i sultânî helvacılarından Mustafa Bey ve İsmail Bey ibney Himmet mahzarlarında üzerlerine da‘vâ ve takrîr-i kelâm edip müteveffâ-yı mezbûr İsmail Ağa ile ben li-ebeveyn karındaşlar olup vâlidemiz ismi Çerkez <> Emine ve babamız ismi mezbûr Şükrullah ve dedemiz ismi Ali ve maskat-ı re’simiz kasaba-i mezbûrede mahalle-i merkūme olup mezbûr İsmail Ağa vefât ettikde verâseti kızları Fâtıma ve Hadîce ile usûbet-i nesebiye cihetinden bana münhasıra iken mezbûrân Mustafa Bey ve İsmail Bey tereke-i müteveffâ-yı mezbûra bi-gayr-ı hakkın vaz‘-ı yed ve bana teslîmden imtinâ‘ ederler suâl olunsun dedikde gıbbe’s-suâl mezbûr[ân] Mustafa Bey ve İsmail Bey cevâblarında vech-i muharrer üzere terekesine vaz‘-ı yedlerini ikrâr ve müdde‘î-i mezbûrun vech-i meşrûh üzere müdde‘âsını inkâr edicek müdde‘î-i mezbûrdan <> sıdk-ı makāline beyyine taleb olundukda udûl-ı ahrâr-ı ricâl-i Müslimînden mahalle-i mezbûre sükkânından İmâm es-Seyyid <<İsmail>> İbrahim Efendi b. es-Seyyid Halil ve Ebubekir Efendi b. Mustafa ve Mustafa Çelebi b. Veliyüddin ve Ali Çelebi b. Mehmed li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffâ İsmail Ağa ile müdde‘î-i mezbûr Celeb Mehmed Ağa li-ebeveyn karındaşlar olup vâlideleri ismi merkūme Çerkez Emine ve babaları ismi mezbûr Şükrullah ve dedeleri ismi mezbûr Ali ve maskat-ı re’sleri zikr olunan kasaba-i mezbûr mahallâtından Yahya Çelebi mahallesidir müteveffâ-yı mezbûrun terekesine usûbet-i nesebiye cihetinden li-ebeveyn karındaşı mezbûr Celeb Mehmed Ağa’dan gayrı vâris ve âhar müstahık olduğu ma‘lûmumuz değildir biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde gıbbe ri‘âyeti şerâiti’l-kabûl şehâdetleri makbûle olmağın mûcebiyle ba‘de’l-hükm mâ-vaka‘a kayd-şüd. Fî 12 min-Receb sene 1110 Şuhûdü’l-hâl: Helvaî İbrahim Bey b. Halil, Hasan Bey b. Mahmud, Mehmed Çavuş b. Receb el-Mübâşir, Mehmed Beşe b. Hüseyin, Nasuh Beşe b. Yusuf, İbrahim Çelebi b. Mehmed.