Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 947 Hüküm no: 780 Orijinal metin no: [177a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Kadı Muharrem Efendi’nin Çavuşzade Mustafa Efendi Vakfı’na olan borcunun terekeden ödenmesi Mahmiye-i İstanbul’da Yarhisar mahallesi ahâlîsinden olup Medîne-i münevvere kādısı iken vefât eden merhûm Muharrem Efendi b. Mustafa Bey[in] verâseti zevce-i metrûkesi Şerife Âişe Hatun bt. el-müvellâ el-merhûm Nakībü’l-eşrâf es-Seyyid Cafer Efendi ile sagīre kızı Şerife Ümmügülsüm’e ve li-ebin karındaşı Ahmed Ağa’ya münhasıra oldukdan sonra merhûm-ı mûmâ-ileyhin sâbıkā kayın atası olup kendiden mukaddem vefât eden merhûm Çavuşzâde Mustafa Efendi nâm sâhibü’l-hayrın nukūd-ı mevkūfesine bi’l-fi‘il mütevellî olan Osman Efendi b. Mehmed Efendi merhûm-ı mûmâ-ileyh Muharrem Efendi’nin menzilinde akd olunan meclis-i şer‘-i şerîfde terekesine vâzı‘a[tü]’l-yed olan mezbûre Şerife Âişe Hatun’un vekîl-i müsecceli zahrü<>l-müderrisîni’l-kirâm Murad Efendi b. Ali ve birâderi mezbûr Ahmed Ağa mahzarlarında üzerlerine bi’t-tevliye da‘vâ ve takrîr-i kelâm edip merhûm-ı mûmâ-ileyh Muharrem Efendi b. Mustafa hayâtında vakf-ı mezbûrun meşrûtiyyet üzere nâzırı olmağla mal-ı vakf-ı mezbûrdan makbûzu olan yedi yüz guruşun dört yüz elli guruşunu Şam’dan ma‘zûl fazîletlü Ebubekir Efendi’ye ve on guruşunu Bostânî Mehmed Ağa’ya idâne ve teslîm ve bâkī iki yüz kırk guruşunu kendi mesârifine sarfla istihlâk etmekle zimmetinde cânib-i vakfa edâsı lâzım deyni olup hattâ hâl-i kemâl-i sıhhatinde Medîne-i münevvere’ye gider oldukda meblağ-ı bâkī-i mezbûr vech-i muharrer üzere taraf-ı vakfa deyni olduğunu şuhûd mahzarında ikrâr ve işhâd ettiğinden sonra kable’l-edâ vefât etmeğin terekesinden taleb ederim suâl olunsun dedikde gıbbe’s-suâl ve’l-inkâr mütevellî-i merkūmdan sıdk-ı makāline muvâfıka beyyine taleb olundukda merhûm-ı mûmâ-ileyhin dâyini Acemzâde el-Hâc Mustafa b. Mehmed ve kethüdâsı el-Hâc İbrahim Çelebi b. Ahmed li-ecli’ş-şehâde meclis-i ma‘kūda hâzırân olup isre’l-istişhâd fi’l-vâki‘ merhûm-ı mûmâ-ileyh Muharrem Efendi b. Mustafa hâl-i kemâl-i sıhhatinde Medîne-i münevvere’ye gider oldukda nezâretim hasebiyle mal-ı vakf-ı mezbûrdan makbûzum olan yedi yüz guruşun dört yüz elli guruşunu Şam’dan ma‘zûl fazîletlü Ebubekir Efendi’ye ve on guruşunu Bostânî Mehmed Ağa’ya idâne ve teslîm ve bâkī iki yüz kırk guruşunu kendi mesârifime sarfla istihlâk etmekle zimmetimde cânib-i vakfa edâsı lâzım deynimdir deyü huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiye şehâdetleri makbûle <> olup müdde‘î-i mezbûrun sun‘u olmamağla tahlîf lâzım gelmemeğin mûcebince ba‘de’l-hükm ve’t-tenbîh mâ-vaka‘a kayd-şüd. Fî 10 min-Cumâdelâhire sene 1110 Şuhûdü’l-hâl: Umdetü’l-mevâli’l-izâm es-Seyyid Mehmed Efendi kādı-ı İzmir(?) sâbıkā, Zahrü’l-müderrisîni’l-kirâm Abdullah Efendi, umdetü’l-mahâdîm es-Seyyid Mehmed Efendi Nakībzâde, Mehmed Efendi b. Ahmed, Mehmed Çelebi b. Muharrem, el-Hâc Süleyman b. ( ) Çukadâr, Hüseyin Çelebi b. Mehmed ve gayruhum mine’l-huzzâr.