Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 951 Hüküm no: 785 Orijinal metin no: [178a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Şeyhzade Mehmed Efendi’nin Demirhan mahallesi avarız vakfına olan borcunu çocuklarının ödemeyi taahhüt ettikleri Husûs-ı âti’l-beyânın mahallinde ketb ü tahrîri iltimâs olunmağın taraf-ı şer‘-i kavîmden me’zûnen Mukayyid Mustafa Efendi irsâl olunup ol dahi mahmiye-i İstanbul’da Demirhan Mescid-i şerîfi’ne varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i âlî eyledikde mahalle-i mezbûre avârızına mevkūfe nukūda bi’l-fi‘il mütevellî olan İmâm Hasan Efendi b. Mehmed ve mahalle-i mezbûre ahâlîsinden İmâm Ahmed Efendi b. Mustafa ve el-Hâc Ahmed b. Hasan ve el-Hâc Musa b. Hüseyin ve Ömer Beşe b. Mehmed ve el-Hâc Halil b. Ahmed ve el-Hâc Mehmed b. Ömer ve Abdullah Çelebi b. el-Hâc Mustafa ve Musa Beşe b. Ali ve diğer el-Hâc Halil b. Ali ve es-Seyyid Ahmed Çelebi b. el-Hâc Mustafa ve Hacı Süleyman Ağa b. Şa‘bân ve es-Seyyid Ali Efendi b. Mustafa ve İmâm Osman Efendi b. Ömer ve Hasan Efendi b. Ali nâm kimesne[ler] meclis-i ma‘kūd-ı mezbûrda mahalle-i mezbûre imâmı ve vakf-ı mezbûrun mütevellîsi iken bundan akdem vedâ‘-ı âlem-i fânî eden merhûm Şeyhzâde Mehmed Efendi b. Süleyman’ın kebîr oğulları işbu bâ‘iseyü’l-vesîka Süleyman Efendi ve Ahmed Efendi mahzarlarında her biri ikrâr ve takrîr-i kelâm edip müteveffâ-yı mezbûr Şeyhzâde Mehmed Efendi b. Süleyman hayâtında vakf-ı mezbûra mütevellî olmağla makbûzu olan dört yüz guruşu mücehhelen fevt olmağla terekesinden damân lâzım gelmeğin meblağ-ı merkūmu mezbûrân Süleyman Efendi ve Ahmed Efendi muvâcehelerinde huzûr-ı hâkimde taleb ve da‘vâ ve müdde‘âmızı isbât edip terekesinden edâya mezbûrâna tenbîh olundukda onlar dahi babamız merhûmun terekesine vaz‘-ı yed etmedik deyü inkâr etmeleriyle beynimizde münâza‘ât vâkı‘a olmuşidi el-hâletü hâzihi meblağ-ı merkūm dört yüz guruşun iki yüz guruşundan her birimiz hissemize lâzım gelen meblağı cânib-i vakfa dâmin olmak vechi üzere iki yüz guruş da‘vâsından veresesinin zimmetlerini ibrâ ve iskāt [178b] edip ve iki yüz guruşu dahi mezbûrân Süleyman Efendi ve Ahmed Efendi âcilen edâya iktidârları olmayıp tecîle tâlib olmalarıyla biz dahi târîh-i kitâbdan bir sene tamâmına değin tecîl eylediğimizde mezbûrân Süleyman Efendi ve Ahmed Efendi dahi kabûl ve onu on bir buçuk hesâbı üzere iltizâm-ı ribh edip vech-i muharrer üzere deynimizdir deyü yedimize deyn temessükü verdiler dediklerinde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an ba‘s olunan Hasan b. Abdullah ve Dilaver b. Abdullah ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd-şüd. Fî gurreti Receb sene 1110 Şuhûdü’l-hâl: İbrahim Çelebi b. Gazanfer, Mustafa Çelebi b. Yahya Efendi, İbrahim Çelebi b. Ramazan, Ahmed Çelebi b. Mehmed, Hacı Dilaver b. Abdullah, Uşşâkī Mehmed Efendi.