Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 951 Hüküm no: 784 Orijinal metin no: [178a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa’nın evini Havva Hatun’a sattığı Husûs-ı âti’l-beyânın mahallinde ketb ü tahrîri içün savb-ı şer‘-i enverden Mevlânâ Yusuf Efendi b. Veliyüddin irsâl olunup < > İstanbul’da Kumkapı kurbünde Cerrâhbaşı İshak Bey mahallesinde zikri âtî menzile varıp zeyl-i kitâbda isimleri mastûr Müslimîn huzûrlarında akd-i meclis-i şer‘-i şerîf ettikde mahalle-i mezbûrede sâkin Mehmed Ağa b. Hasan Efendi meclis-i ma‘kūd-ı mezbûrda zâtı mahalle-i mezbûre ahâlîsinden Hüseyin Efendi b. Mehmed ve Ahmed Bey b. Süleyman ta‘rîfleri ile mu‘arrefe olan hâfızatü’l-kitâb Havva Hatun bt. Abdullah mahzarında ikrâr ve takrîr-i kelâm edip arsasının senede Sinan Bey Vakfı’na yüz elli akçe mukāta‘ası olup binâsı akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ bir tarafı Hasan Paşa menzili ve iki tarafı vakf-ı mezbûr odalarına [müntehî] olup ve bir taraf tarîk-i âm ile mahdûd ve müntehî tahtânî iki bâb oda ve bir sofa ve bir su kuyusu ve havlu ve kenîfi müştemil işbu mülk menzilimi bi-cümleti’t-tevâbi‘ ve’l-levâhık ve kâffeti’l-menâfi‘ <> ve’l-merâfık mezbûre Havva Hatun’a yüz on guruşa bey‘ u temlîk ve teslîm ol dahi iştirâ ve temellük ve kabûl eyledikden sonra semeni olan meblağ-ı mezbûr yüz on guruşu mezbûre Havva Hatun yedinden tamâmen alıp kabz eyledim ba‘de’l-yevm menzil-i mahdûd-ı mezbûr merkūme Havva Hatun’un mülk-i müşterâsıdır keyfe mâ teşâ ve tehtâr mutasarrıfe olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an ba‘s olunan İbrahim Çelebi b. Mehmed ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd-şüd. Fî 16 min-Recebi’l-ferd sene 1110 Şuhûdü’l-hâl: Fahrü’l-eimme el-Hâc Halil Efendi b. Abdurrahman, Hüseyin Efendi b. Abdullah, Mehmed Ağa b. İbrahim, el-Hâc Ramazan Ağa b. ( ), Hüseyin Efendi b. Mehmed ve Ahmed Bey b. Süleyman.