Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 955 Hüküm no: 788 Orijinal metin no: [179a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa’nın vefat eden Hattat Osman Efendi’de alacağı olduğunu ispat ettiği Mahmiye-i İstanbul’da Sancakdâr Hayreddin mahallesinde sâkin iken bundan akdem vefât eden Hattat Osman Efendi b. Ali’nin verâseti zevce-i menkûha-i metrûkesi Hadîce bt. Abdullah ile kebîr oğlu Ali ve sagīr oğlu Mehmed ve sagīre kızları Emine ve Fâtıma’ya münhasıra oldukdan sonra mahalle-i mezbûrede sâkin el-Hâc Mustafa b. Ahmed mahfil-i kazâda zikr olunan sagīrlerin tesviye-i emrlerine kıbel-i şer‘den mansûb vasîleri ve ammileri Ahmed Çelebi b. Ali mahzarında üzerine da‘vâ ve takrîr-i kelâm edip müteveffâ-yı mezbûr Osman Efendi b. Ali zimmetinde cihet-i deyn-i şer‘îden yetmiş guruş hakkım olup hattâ hâl-i kemâl-i sıhhatinde fevtinden on beş ay mukaddem cihet-i mezbûreden zimmetinde bana reddi vâcib ol kadar guruş deyni olduğunu huzûr-ı Müslimînde ikrâr ve işhâd edip kable’l-edâ fevt olmağla yed-i vasîde olan tereke-i vâfiyesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olun[duk]da udûl-ı ahrâr-ı ricâl-i Müslimînden olup mahalle-i mezbûrede sâkin İmâm Mustafa Efendi b. Mehmed ve Çelebioğlu mahallesinde sâkin İmâm Ali Efendi b. İbrahim li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûr Osman Efendi b. Ali hâl-i kemâl-i sıhhatinde fevtinden on beş ay mukaddem cihet-i deyn-i şer‘îden zimmetimde işbu müdde‘î-i mezbûr el-Hâc Mustafa b. Ahmed’e reddi vâcib yetmiş guruş deynim vardır deyü huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm mâ-vaka‘a kayd-şüd. Fî 10 min-Recebi’l-mürecceb sene 1110 Şuhûdü’l-hâl: Mehmed Beşe b. Mustafa, Mehmed b. Mahmud, Rûşenî Mehmed Efendi b. ( ), Muhzır Hüseyin Çelebi b. Mehmed, Ahmed Çelebi b. Süleyman.