Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 977 Hüküm no: 800 Orijinal metin no: [182a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hanım’ın vefat eden eşi Süleyman Beşe’de mehir alacağı olduğunu ispat ettiği Husûs-ı âti’z-zikrin mahallinde istimâ‘ ve tahrîri içün bi’l-iltimâs cânib-i şer‘-i şerîfden irsâl olunan Mevlânâ Mehmed Efendi b. Mahmud mahmiye-i İstanbul’da Bezzâzistân-ı atîk kurbünde beytülmâli’l-hâs emîni sâkin olduğu odaya varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i âlî ettikde mahmiye-i mezbûrede Dîvâne Ali mahallesinde sâkin iken bundan akdem maktûlen vefât eden Süleyman Beşe b. İsmail b. Abdullah’ın zâhirde zevce-i menkûha-i metrûkesi Hadîce bt. Abdullah’dan gayrı vâris-i ma‘rûfu olmamağla terekesinin rub‘u mezbûreye ve selâse-i erbâ‘ı cânib-i beytülmâle âid oldukdan sonra zâtı mahalle-i mezbûre imâmı Mehmed Efendi b. Muharrem ve Halil Çelebi b. Ahmed ta‘rîfleriyle mu‘arrefe olan işbu hâfızatü’l-kitâb mezbûre Hadîce meclis-i ma‘kūd-ı mezkûrda mahmiye-i mezbûrede bi’l-fi‘il beytülmâli’l-hâs emîni umdetü’l-a‘yân Mustafa Ağa b. Abdurrahman b. Abdülmennan tarafından husûs-ı âti’l-beyânda müseccel vekîli olmağla tereke-i müteveffâ-yı mezbûra bi’l-vekâle vaz‘-ı yed ve kıbel-i şer‘den ber-vech-i âtî husûmet ve redd ü cevâba me’zûn olan Mehmed Çelebi b. Mustafa mahzarında üzerine [da‘vâ] ve takrîr-i kelâm edip ben müteveffâ-yı mezbûrun memlûke câriye ve ümmü’l-veledi iken fevtinden on ay mukaddem beni hasbeten lillâhi’l-meliki’l-hallâk malından tahrîr ve i‘tâk edip ba‘dehû üç bin sağ akçe mehr-i müeccel tesmiyesiyle huzûr-ı Müslimînde tezevvüc ve kabûl edip akd-i nikâh beynimizde kāim iken meblağ-ı mezbûru kable’l-edâ fevt olmağla terekesinden taleb ederim suâl olunsun dedikde gıbbe’s-suâl vekîl-i mezbûr cevâbında tereke-i müteveffâ-yı mezbûra ber-vech-i muharrer vaz‘-ı yedini ikrâr ve müdde‘iye-i mezbûrenin vech-i mübeyyen üzere müdde‘âsını inkâr edicek müdde‘iye-i mezbûreden müdde‘âsına beyyine taleb olundukda udûl-ı ahrâr-ı ricâl-i Müslimînden ma‘rûf merkūm Mehmed Efendi ile mahmiye-i mezbûrede Hamza Paşa mahallesinde sâkin Ömer Efendi b. Halil ve Emin Sinan mahallesinde sâkin Mahmud b. Abdülbaki nâm kimesneler li-ecli’ş-şehâde meclis-i ma‘kūd-ı mezbûra hâzırûn olup isre’l-istişhâd fi’l-vâki‘ müteveffâ-yı mezbûr Süleyman Beşe b. İsmail b. Abdullah fevtinden on ay mukaddem işbu müdde‘iye-i mezbûre câriye-i memlûkesi ve ümmü’l-veledi iken hasbeten lillâhi te‘âlâ malından tahrîr ve i‘tâk edip ba‘dehû üç bin sağ akçe mehr-i müeccel tesmiyesiyle huzûrumuzda tezevvüc ve kabûl edip akd-i nikâh beynlerinde kāim iken vefât eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan Ahmed Çelebi b. Süleyman ve Mehmed b. Mustafa ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd-şüd. Fî 27 min-Cumâdelâhire sene 1110 Şuhûdü’l-hâl: İbrahim Çelebi b. Mehmed Efendi, Süleyman Çelebi b. Ahmed Nâzır-ı beytülmâl, Halil Efendi Kâtib-i mîrî, Ahmed Çelebi b. Derviş, Halil Çelebi b. Ahmed.