Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 987 Hüküm no: 803 Orijinal metin no: [183b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Nüzul Kâtibi Hüseyin Efendi’nin kızı Fatıma ile doğacak çocuğuna dedeleri Vezir Siyavuş Paşa’nın vasi tayin edildiği Mahmiye-i İstanbul’da Kalenderhane mahallesi sükkânından olup işbu sene-i mübârekede hacc-ı şerîfe gider iken medîne-i Mısr-ı Kāhire’de vefât eden Mevkūfât hulefâsından Nüzûl kâtibi Hüseyin Efendi b. Hasan b. Abdullah’ın verâseti zevce-i metrûkesi fahrü’l-muhadderât Hümaşah Hatun bt. Mehmed Bey’e ve sulbiye sagīre kızı Fâtıma’ya ve zevce-i mezbûrenin batnında müstebîn hamle münhasıra olduğu şer‘an sâbit ve mütehakkık oldukdan sonra haml-i mezbûr ile sagīre-i mezbûrenin tesviye-i umûrlarına cânib-i şer‘-i şerîfden bir vasî nasb ü ta‘yîn olunmak lâzım ve mühim olmağın diyânetle ma‘rûf ve istikāmetle mevsûf her vechile vesâyet uhdesinden gelmeğe kādir olduğu lede’ş-şer‘i’l-enver zâhir ve mukarrer olan li-ümmin cedleri umdetü’l-emâcid ve’l-a‘yân mûmâ-ileyh Mehmed Bey b. el-Vezîr el-merhûm Siyavuş Paşa’yı haml-i mezbûr ile sagīre-i mezbûre Fâtıma’nın ahvâlini zabt ve babaları merhûm-ı merkūm Hüseyin Efendi’den müntakil olan emvâllerini hıfz ve sâir tesviye-i umûrlarına hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri vasî nasb ü ta‘yîn ettiklerinde mûmâ-ileyh Mehmed Bey dahi vesâyet-i mezbûreyi kabûl ve merâsimini kemâ hüve hakkuhû edâya ta‘ahhüd ve iltizâm etmeğin mâ-vaka‘a kayd-şüd. Fî 18 min-Recebi’l-ferd sene 1110 Şuhûdü’l-hâl: Fahrü’l-eimmeti’l-kirâm Mustafa Efendi İmâm-ı evvel-i Sultan Bayezid, Fahrü’l-eşbâh Hızır Ağa b. Şa‘bân, Fahrü’l-emâsil Mehmed Ağa b. Mihalzâde, Mehmed Efendi b. Ali, Fahrü’l-emâcid(?) Abdurrahim Bey b. Abdülbaki Bey, Fahrü’l-akrân Abdüllatif Bey b. Abdülbaki Bey, el-Hâc Süleyman Çukadâr, İbrahim Çelebi b. Mehmed.