Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 988 Hüküm no: 804 Orijinal metin no: [183b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Nüzul Kâtibi Hüseyin Efendi’nin Tüccar Osman Ağa’da emanet bir sandığı olduğu Mahmiye-i İstanbul’da Kalenderhane mahallesi ahâlîsinden olup işbu sene-i mübârekede hacc-ı şerîfe giderken vech-i âtî üzere Mısr-ı Kāhire’de vefât eden Mevkūfât halîfelerinden Nüzûl kâtibi Hüseyin Efendi b. Hasan b. Abdullah’ın verâseti zevce-i metrûkesi fahrü’l-muhadderât Hümaşah Hatun bt. Mehmed Bey b. el-merhûm el-mağfûr-leh Siyavuş Paşa’ya ve mezbûrenin batnında müstebîn hamle ve sulbiye sagīre kızı Fâtıma’ya münhasıra oldukdan sonra haml-i mezbûr ile sagīre-i mezbûrenin tesviye-i emrlerine hüccet-i şer‘iyye ile taraf-ı şer‘den mansûb vasîleri olup mezbûre Hümaşah Hatun tarafından husûs-ı âti’l-beyânda vekîl olduğu zâtını ma‘rifet-i şer‘iyye ile ârifân Sultan Bayezid mahallesi sükkânından Mehmed Efendi b. Sadık ve Abdurrahim Bey b. Abdülbaki şehâdetleri hasm-ı câhidde sâbit ve sübût-ı vekâletine hükm-i şer‘î lâhık olan mezbûre Hümaşah Hatun’un babası umdetü’l-emâcid ve’l-a‘yân mûmâ-ileyh meclis [Mehmed] Bey meclis-i şer‘-i şerîfde müteveffâ-yı mezbûr Hüseyin Efendi’nin mûdi‘i olup Valide Hanı’nda tüccârından fahrü’t-tüccâr el-Hâc Osman Ağa b. el-Hâc Mustafa mahzarında üzerine vesâyeten ve vekâleten da‘vâ ve takrîr-i kelâm edip mezbûr Hüseyin Efendi b. Hasan b. Abdullah işbu bin yüz on senesi Cumâdel[ûlâ]sı’nın on ikinci gününde medîne-i Mısır’da Kal‘aiçi’nde hâsıl harcî ağası olan Canbaz es-Seyyid Ahmed Ağa’nın konağında müsâfiren sâkin iken bi-emrillâhi te‘âlâ fücceten vefât edip ve kızım mezbûre Hümaşah Hatun mezbûr Hüseyin Efendi’nin zevce-i menkûha-i metrûkesi olup ve sagīre-i mezbûre Fâtıma müteveffâ-yı mezbûrun firâşından hâsıla ve zevce-i mezbûresinden mütevellide sulbiye kızıdır müteveffâ-yı mezbûr Hüseyin Efendi’nin verâseti zevce-i metrûkesi mezbûre Hümaşah Hatun’a ve batnında müstebîn olan hamle ve sagīre kızı mezbûre Fâtıma’ya münhasıradır müteveffâ-yı mezbûr hayâtında merkūm el-Hâc Osman Ağa’ya îdâ‘ ve teslîm eylediği bir mukaffel ve mahtûm sepet sandığını verese-i merkūmûn içün bana teslîme tenbîh olunmak matlûbumdur dedikde gıbbe’s-suâl merkūm el-Hâc Osman Ağa cevâbında müteveffâ-yı mezbûr Hüseyin Efendi hayâtında bir mukaffel ve mahtûm sepet sandığını kendüye îdâ‘ ve teslîm ve hâlâ yedinde mahfûz olduğunu ikrâr lâkin mezbûrun mevtini ve merkūmûnun verâsetlerini inkâr edicek müdde‘î-i mûmâ-ileyhden evvelâ mezbûr Hüseyin Efendi’nin mevtine beyyine taleb olundukda hâlâ Muhâfız-ı Mısır devletlü Vezîr-i mükerrem Hüseyin Paşa hazretlerinin ağalarından olup mahmiye-i mezbûrede Servi mahallesinde sâkin Sami İbrahim Efendi’nin kethüdâsı [184a] fahrü’l-akrân Hasan Ağa b. Hüseyin ve dâmad-ı hazret-i sadr-ı âlî sa‘âdetlü el-Hâc Ali Paşa hazretlerinin çukadârı olup mahrûse-i Üsküdar’da ( ) mahallesinde sâkin Hüseyin Ağa b. Hasan li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ Mevkūfât hulefâsından Nüzûl kâtibi mezbûr Hüseyin Efendi b. Hasan b. Abdullah işbu bin yüz on senesi Cumâdelûlâsı’nın on ikinci gününde medîne-i Mısır’da Kal‘aiçi’nde hâsıl harcî ağası olan Canbaz es-Seyyid Ahmed Ağa’nın konağında müsâfiren sâkin iken bi-emrillâhi te‘âlâ huzûrumuzda fücceten vefât edip namazı kılınıp mekābir-i Müslimîne defn olundu biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olup sâniyen merkūmûnun verâsetlerine beyyine taleb olundukda mezbûrân Mehmed Efendi b. Sadık ve Abdurrahim Bey b. Abdülbaki li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ müdde‘î-i mûmâ-ileyh Mehmed Bey’in kızı müvekkile-i mezbûre Hümaşah Hatun müteveffâ-yı mezbûr Hüseyin Efendi b. Hasan b. Abdullah’ın zevce-i menkûha-i metrûkesi olup ve sagīre-i mezbûre Fâtıma müteveffâ-yı mezbûrun firâşından hâsıla ve zevce-i mezbûresinden mütevellide sulbiye kızıdır müteveffâ-yı mezbûr Hüseyin Efendi’nin verâseti zevce-i metrûkesi mezbûre Hümaşah Hatun’a ve mezbûrenin batnında müstebîn olan hamle ve sagīre-i mezbûre Fâtıma’ya münhasıradır bunlardan gayrı vârisi ve terekesine müstahıkk-ı âhar olduğu ma‘lûmumuz değildir biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûceblerince ba‘de’l-hükm ve’t-tenbîh mâ-vaka‘a kayd-şüd. Fî 18 min-Recebi’l-ferd sene 1110 Şuhûdü’l-hâl: Abdurrahman Efendi b. el-merhûm Ahmed Efendi, Abdüllatif Bey b. Abdülbaki, el-Hâc İdris Ağa b. Ahmed, Rûşenî Mehmed Efendi b. İbrahim, el-Hâc Süleyman b. Mehmed, İbrahim Çelebi b. Mehmed.