Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 1003 Hüküm no: 816 Orijinal metin no: [186a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rus asıllı cariye Hatice’nin hür olduğunu ispat ettiği Kezâlik akd-i meclis-i şer‘-i şerîf eyledikde müteveffâ-yı mezbûra rıkk-ı sâbıkını mu‘terife orta boylu açık kaşlı gök elâ gözlü Rusiyyetü’l-asl işbu Hadîce bt. Abdullah meclis-i ma‘kūd-ı mezbûrda müteveffâ-yı mezbûrun evlâd-ı sıgārının tesviye-i emrlerine bâ-hüccet-i şer‘iyye vasiyy-i muhtârı olmağla terekesine vaz‘-ı yed eden Süleyman Ağa b. el-Hâc Ömer mahzarında üzerine da‘vâ ve takrîr-i kelâm edip seyyidim müteveffâ-yı mezbûr Hüseyin Ağa b. Kasım b. Receb’in yedinde abd-ı memlûkü olduğum hâlde kasaba-i mezbûrede hâl-i kemâl-i sıhhatinde fevtinden iki ay mukaddem huzûr-ı Müslimînde [186b] malından beni âzâd ve zümre-i harâir-i asliyât silkine idrâc ve ilhâk edip ve fevtinden sonra terekesinin sülüsünden benim içün mu‘takam Hadîce’ye yüz guruş verile deyü vasiyet edip musırran-aleyhâ fevt olmağla terekesinin sülüsü mûsâ-lehâ-i mezkûra vâfî ve kâfî olmağla meblağ-ı mezbûru vasiyy-i mezbûrdan taleb eylediğimde teslîmden imtinâ‘ ve bana terekeden olup rık olmak üzere vaz‘-ı yed eder suâl olunsun dedikde gıbbe’s-suâl vasiyy-i mezbûr cevâbında mevsûfe-i mezbûre terekeden olup rık olmak üzere vaz‘-ı yedini ikrâr ve mevsûfe-i mezbûrenin vech-i muharrer üzere müdde‘âsını inkâr edicek mevsûfe-i mezbûreden müdde‘âsını mübeyyine beyyine taleb olundukda udûl-ı ahrâr-ı ricâl-i Müslimînden mahmiye-i mezbûrede Molla Şeref mahallesi ahâlîsinden olup müteveffâ-yı mezbûr ile ma‘an kasaba-i mezbûrede olan fahrü’l-a‘yân el-Hâc Şahin Ağa b. Sinan ve Halil Ağa b. Abdullah li-ecli’ş-şehâde meclis-i ma‘kūd-ı mezbûra hâzırân olup istişhâd olunduklarında fi’l-vâki‘ müteveffâ-yı mezbûr Hüseyin Ağa b. Kasım b. Receb işbu mevsûfe-i mezbûre Hadîce’yi yedinde câriye-i memlûkesi olduğu hâlde kasaba-i mezbûrede hâl-i kemâl-i sıhhatinde fevtinden iki ay mukaddem huzûrumuzda malından âzâd ve zümre-i ahrâr-ı asliyâta idrâc ve ilhâk edip ve fevtinden sonra terekesinin sülüsünden mevsûfe-i mezbûre Hadîce’ye yüz guruş verile deyü vasiyet edip musırran-aleyhâ fevt olmağla terekesinin sülüsü meblağ-ı mûsâ-bihâ-i mezkûra müsâ‘iddir biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr kezâlik inhâ ve takrîr etmeğin mâ-vaka‘a kayd-şüd. Fî 15 min-Cumâdelâhire sene 1110 Şuhûdü’l-hâl: Eş-şâhidûnü’s-sâbikūn.