Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 1004 Hüküm no: 817 Orijinal metin no: [186b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa’nın vefat eden Hüseyin Ağa’da alacağı olduğunu ispat ettiği Kezâlik akd-i meclis-i şer‘-i şerîf eyledikde mahalle-i mezbûrede sâkin işbu bâ‘isü’l-kitâb Mustafa b. Mehmed Efendi meclis-i ma‘kūd-ı mezbûrda müteveffâ-yı mezbûrun evlâd-ı sıgārının tesviye-i emrlerine bâ-hüccet-i şer‘iyye vasiyy-i muhtârı olmağla terekesine vaz‘-ı yed eden dâmadı Süleyman Ağa b. el-Hâc Ömer mahzarında üzerine da‘vâ ve takrîr-i kelâm edip müteveffâ-yı mezbûr Hüseyin Ağa b. Kasım b. Receb zimmetinde cihet-i karz-ı şer‘îden yüz otuz guruş hakkım olup hattâ hâl-i kemâl-i sıhhatinde fevtinden üç ay mukaddem meblağ-ı mezbûr yüz otuz guruş bana zimmetinde edâsı lâzım deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan sıdk-ı makāline beyyine taleb olundukda udûl-ı ahrâr-ı ricâl-i Müslimînden mahalle-i mezbûrede sâkin İmâm Mehmed Efendi b. Receb ve el-Hâc Yahya b. Hüseyin li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffâ-yı mezbûr Hüseyin Ağa b. Kasım b. Receb işbu müdde‘î-i mezbûr Mustafa Ağ b. Mehmed Efendi’ye cihet-i karz-ı şer‘îden meblağ-ı mezbûr yüz otuz guruş zimmetinde edâsı lâzım deyni olduğunu hâl-i kemâl-i sıhhatinde fevtinden üç ay mukaddem huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle vâki‘ hâli mevlânâ-yı mezbûr kezâlik inhâ ve takrîr etmeğin mâ-vaka‘a kayd-şüd. Fî 16 min-Cumâdelâhire sene 1110 Şuhûdü’l-hâl: Eş-şâhidûnü’s-sâbikūn.