Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 1007 Hüküm no: 821 Orijinal metin no: [187a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Çelebi’nin vefat eden Feyzullah Efendi’nin kendisine bir miktar para vasiyet ettiğini ispat ettiği Husûs-ı âti’l-beyânın mahallinde istimâ‘ ve tahrîri iltimâs olunmağın bu fakīr mahmiye-i İstanbul’da Ayasofya-i Kebîr mahallesinde vâki‘ Birâderzâde denmekle ma‘rûf mefharü’l-müderrisîni’l-kirâm Mustafa Efendi b. el-müvellâ el-merhûm Ahmed Efendi’nin sa‘âdethânesine varıp zeyl-i rakīmde mastûrü’l-esâmî Müslimîn mahzarlarında akd-i meclis-i şer‘-i kavîm ettikde asrında şeyhülislâm olup mahrûse-i Galata müzâfâtından Beşiktaş kasabasında vâki‘ yalı ta‘bîr olunur saraylarında sâkin iken bundan akdem vedâ‘-ı âlem-i fânî eden merhûm ve mağfûrun-leh Ebû Said Efendizâde demekle şehîr Feyzullah Efendi’nin verâseti halîle-i celîlesi fahrü’l-muhadderât Dilgüşa Hatun bt. Abdullah’a ve sulbiye kerîme-i mükerremesi umdetü’l-muhadderât tâcü’l-mestûrât Safiye Kadın’a ve kendilerden mukaddem dâr-ı bekāya rıhlet eden sulbî oğlu merhûm Mehmed Reşid Efendi’nin sulbî evlâdları mefharü’l-mahâdîm Abdullah Çelebi Efendi nâm mürâhıka ve mefâhirü’l-muhadderât Âişe Hatun ve Râbia Hatun ve Emetullah Hatun’a münhasıra olduğu zâhir ve mütebeyyin oldukdan sonra merhûm-ı müşârün-ileyh Feyz[ullah] Efendi’nin etbâ‘larından işbu hâfızü’l-vesîka İbrahim Çelebi b. Mehmed [187b] meclis-i ma‘kūd-ı mezbûrda vech-i âtî üzere merhûm-ı müşârün-ileyhin terekesine vâzı‘u’l-yed olan zevce-i mezbûre tarafından terekeye müte‘allıka âmme-i umûrlarında vekîl olduğu hüccet-i şer‘iyye ile sâbit ve sübût-ı vekâletine hükm-i şer‘î lâhık olan Bezistân-ı atîk tüccârından Mustafa Çelebi b. İbrahim ve mürâhık-ı mûmâ-ileyhin hüccet-i şer‘iyye ile vasiyy-i muhtârı olan merhûm-ı mûmâ-ileyhin kethüdâları el-Hâc Mehmed Efendi b. Sefer mahzarlarında üzerlerine da‘vâ ve takrîr-i kelâm edip efendim merhûm-ı müşârün-ileyh Ebû Said Efendizâde Feyzullah Efendi hayâtında intikālinden altı ay mukaddem bi-emrillâhi te‘âlâ kazâ-i nahb ettiğimde sülüs-i malımdan iki yüz guruş bana verile deyü huzûr-ı Müslimînde vasiyet buyurup musırran-aleyhâ rıhlet ettikde sülüs-i malı mûsâ-bih olan meblağa vâfî ve kâfî olmağla terekesinden taleb ederim suâl olunup alıverilmesi matlûbumdur dedikde gıbbe’s-suâl ve akībe’l-inkâr müdde‘î-i mezbûrdan sıdk-ı makāline beyyine taleb olundukda fuhûl-i udûl-ı ricâl-i Müslimînden sâbıkā Kudüs-i şerîf kādısı umdetü’l-mevâli’l-izâm fazîletlü Mahmud Efendi b. ( ) ve müşârün-ileyh Birâderzâde Mustafa Efendi b. el-müvellâ el-merhûm Ahmed Efendi li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka merhûm-ı müşârün-ileyh Ebû Said Efendi demekle şehîr Feyzullah Efendi hazretleri hayâtında intikāllerinden altı ay mukaddem bi-emrillâhi te‘âlâ kazâ-i nahb ettiğimde sülüs-i malımdan işbu müdde‘î-i mezbûr İbrahim Çelebi’ye iki yüz guruş verile deyü huzûrumuzda vasiyet buyurup musırran-aleyhâ rıhlet ettiklerinde terekesinin sülüsü meblağ-ı mezbûra vâfî ve kâfîdir biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde gıbbe ri‘âyeti şerâiti’l-kabûl şehâdetleri makbûle olmağın mûcebiyle ba‘de’l-hükm mâ-vaka‘a kayd-şüd. Fî 7 min-Recebi’l-ferd sene 1110 Şuhûdü’l-hâl: Sâbıkā Rumeli kazaskeri olan sa‘âdetlü inâyetlü Yahya Efendi hazretlerinin mahdûm-ı âlî-kadrleri sa‘âdetlü fazîletlü Feyzullah Efendi, Fahrü’l-müderrisîn Abdülbaki Efendi b. Hüseyin Ağa, Hoca Mehmed Efendi b. Ali, el-Hâc Mustafa Çelebi b. Ali, Ali Çelebi b. Mustafa.