Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 1006 Hüküm no: 820 Orijinal metin no: [187a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hümaşah Hatun’un vefat eden eşi Hüseyin Efendi’de mehir alacağı olduğunu ispat ettiği Husûs-ı câi’z-zikrin mahallinde tahrîri iltimâs olunmağın savb-ı şer‘-i âlîden me’zûnen irsâl olunan Mevlânâ es-Seyyid Abdülmuti Efendi umdetü’l-a‘yân ve’l-eşbâh Mehmed Bey b. el-Vezîr el-merhûm Siyavuş Paşa’nın mahmiye-i İstanbul’da Sultan Bayezid mahallesinde vâki‘ saraylarına varıp zeyl-i kitâbda muharrerü’l-esâmî udûl-ı Müslimîn ve sikāt-ı müminîn huzûrunda akd-i meclis-i şer‘-i şerîf eyledikde mahmiye-i mezbûrede Kalenderhane mahallesi sükkânından olup işbu sene-i mübârekede hacc-ı şerîfe giderken medîne-i Mısır’da vefât eden Mevkūfât halîfelerinden merhûm Hüseyin Efendi b. Hasan b. Abdullah’ın verâseti zevce-i metrûkesi zahrü’l-muhadderât Hümaşah Hatun bt. el-mûmâ-ileyh Mehmed Bey’e ve mezbûrenin batnında müstebîn hamle ve sagīre kızı Fâtıma’ya münhasıra olduğu şer‘an mütehakkık oldukdan sonra mezbûre Hümaşah Hatun tarafından husûs-ı âti’l-beyânda vekîl olduğu zâtını ma‘rifet-i şer‘iyye ile ârifân fahrü’l-emâsil Abdurrahim Bey ve Abdüllatif ibney el-merhûm Abdülbaki Bey şehâdetleriyle şer‘an sâbit olan birâderi zahrü’l-emâsil Derviş Mehmed Bey meclis-i ma‘kūd-ı mezbûrda haml-i mezbûr ile sagīre-i mezbûrenin vasiyy-i mansûbları olmağla müteveffâ-yı mezbûrun terekesine vâzı‘u’l-yed olan mûmâ-ileyh Mehmed Bey mahzarında üzerine bi’l-vekâle da‘vâ ve takrîr-i kelâm edip müteveffâ-yı merkūm Hüseyin Efendi b. Hasan b. Abdullah hayâtında bin yüz sekiz senesi Zilka‘de<>sinde müvekkilem mezbûre Hümaşah Hatun’u dört yüz guruş mehr-i müeccel tesmiyesiyle huzûr-ı Müslimînde tezevvüc ve kabûl edip akd-i nikâh beynlerinde kāim iken mehr-i müeccel-i mezbûru kable’l-edâ vefât etmekle terekesinden taleb ederim suâl olunsun dedikde gıbbe’s-suâl ve’l-inkâr vekîl-i merkūmdan sıdk-ı makāline mübeyyine [beyyine] taleb olundukda mahalle-i mezbûre sükkânından fahrü’l-eimmeti’l-kirâm İmâm Mustafa Efendi b. Hüseyin ve fahrü’l-emâsil Kehhâlzâde Mehmed Ağa b. el-Hâc Mehmed li-ecli’ş-şehâde meclis-i ma‘kūda hâzırân olup istişhâd olunduklarında fi’l-vâki‘ Mevkūfât halîfelerinden müteveffâ-yı mezbûr Hüseyin Efendi b. Hasan b. Abdullah bin yüz sekiz senesi Zilka‘desi’nde müvekkile-i mezbûre Hümaşah Hatun bt. Mehmed Bey’i dört yüz guruş mehr-i müeccel tesmiyesiyle bizim huzûrumuzda tezevvüc ve kabûl edip akd-i nikâh beynlerinde kāim iken vefât eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiye şehâdetleri makbûle olmağın ba‘de tahlîfi’l-müvekkileti’l-mezbûre mûcebince ba‘de’l-hükm ve’t-tenbîh vâki‘ hâli mevlânâ-yı mezbûr mahallinde tahrîr ba‘dehû ma‘an ba‘s olunan Çukadâr el-Hâc Süleyman b. Mehmed ve İbrahim b. Ahmed ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd-şüd. Fî 18 min-Recebi’l-ferd sene 1110 Şuhûdü’l-hâl: Fahrü’l-eşbâh Hızır Ağa b. Şa‘bân, Mehmed Efendi b. Sadık, Abdurrahim Bey b. Bâkī Bey, Abdüllatif Bey [b.] Bâkī Bey, el-Hâc Süleyman b. Mehmed.