Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 1009 Hüküm no: 823 Orijinal metin no: [187b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Çelebi’nin vefat eden Feyzullah Efendi’nin kendisine bir miktar para vasiyet ettiğini ispat ettiği Etba‘dan Kezâlik işbu nâkilü’l-kitâb Hüseyin Çelebi b. Abdullah meclis-i ma‘kūd-ı mezbûrda vech-i âtî üzere merhûm-ı müşârün-ileyh terekesine vâzı‘u’l-yed olan zevce-i mûmâ-ileyhâ cânibinden terekeye müte‘allıka âmme-i umûrlarında vekîl olduğu hüccet-i şer‘iyye ile sâbit ve sübût-ı vekâletine hükm-i şer‘î lâhık olan Bezistân-ı atîk tüccârından Mustafa Çelebi b. İbrahim ve mürâhık-ı mûmâ-ileyhin vasiyy-i muhtârı olduğu hüccet-i şer‘iyye ile müsbet olan fahrü’l-eşbâh el-Hâc Mehmed Efendi b. Sefer mahzarlarında üzerlerine da‘vâ ve takrîr-i kelâm edip efendim merhûm-ı müşârün-ileyh Ebû Said Efendizâde Feyzullah Efendi hayâtında intikālinden altı ay mukaddem bi-emrillâhi te‘âlâ kazâ-i nahb ettiğimde sülüs-i malımdan iki yüz guruş bana verile deyü huzûr-ı Müslimînde vasiyet edip musırran-aleyhâ rıhlet ettiklerinde sülüs-i malı mûsâ-bih olan meblağ-ı mezbûra vâfî ve kâfî olmağla terekesinden taleb ederim suâl olunup alıverilmesi matlûbumdur dedikde gıbbe’s-suâl ve akībe’l-inkâr müdde‘î-i mezbûrdan sıdk-ı makāline beyyine taleb olundukda udûl-ı ricâl-i Müslimînden sâbıkā Kudüs-i şerîf mollası umdetü’l-mevâli’l-izâm fazîletlü Mahmud Efendi b. ( ) ve müşârün-ileyh Birâderzâde Mustafa Efendi b. el-müvellâ el-merhûm Ahmed Efendi li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka merhûm-ı müşârün-ileyh Ebû Said Efendizâde Feyzullah Efendi hazretleri hayâtlarında intikālinden altı ay mukaddem bi-emrillâhi te‘âlâ kazâ-i nahb ettiğimde sülüs-i malımdan işbu müdde‘î-i mezbûr Hüseyin Çelebi’ye iki yüz guruş verilsin deyü huzûrumuzda vasiyet buyurup musırran-aleyhâ dâr-ı bekāya rıhlet ettikde terekesinin sülüsü meblağ-ı mezbûra vâfî ve kâfîdir biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mâ-vaka‘a kayd-şüd. Fî 7 min-Receb sene 1110 Şuhûdü’l-hâl: Eş-şâhidûnü’s-sâbikūn.