Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 1010 Hüküm no: 824 Orijinal metin no: [188a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sunullah Çelebi’nin vefat eden Feyzullah Efendi’nin kendisine bir miktar para vasiyet ettiğini ispat ettiği Etba‘dan Kezâlik işbu hâfızü’s-sak Sunullah Çelebi b. Ali mahfil-i ma‘kūd-ı mezbûrda vech-i câî üzere merhûm-ı müşârün-ileyhin terekesine vâzı‘[atü]’l-yed olan zevce-i müşârün-ileyhâ tarafından terekeye müte‘allıka cümle umûrlarında vekîl olduğu hüccet-i şer‘iyye mûcebince sâbit ve sübût-ı vekâletine hükm-i şer‘î lâhık olan Bezistân-ı atîk tüccârından Mustafa Çelebi b. İbrahim ve mürâhık-ı mûmâ-ileyhin hüccet-i şer‘iyye ile vasiyy-i muhtârı olan merhûm-ı mûmâ-ileyhin kethüdâları el-Hâc Mehmed Efendi b. Sefer mahzarında üzerlerine da‘vâ ve takrîr-i kelâm edip efendim merhûm-ı müşârün-ileyh Ebû Said Efendizâde Feyzullah Efendi hayâtlarında intikālinden altı ay mukaddem bi-emrillâhi te‘âlâ kazâ-i nahb ettiğimde sülüs-i malımdan yüz guruş bana verile deyü huzûr-ı Müslimînde vasiyet buyurup musırran-aleyhâ rıhlet ettiklerinde terekesinin sülüsü meblağ-ı mezbûra vâfî ve kâfî olmağla terekesinden taleb ederim suâl olunup alıverilmesi matlûbumdur dedikde gıbbe’s-suâl vekîl <> ve vasiyy-i mezbûrân cevâblarında merhûm-ı müşârün-ileyh terekesine vech-i muharrer üzere vaz‘-ı yedlerini ikrâr ve müdde‘î-i mezbûrun vech-i mübeyyen üzere müdde‘âsını inkâr edicek müdde‘î-i mezbûrdan sıdk-ı makāline beyyine taleb olundukda udûl-ı ricâl-i muvahhidînden sâbıkā Kudüs-i şerîf kādısı umdetü’l-mevâli’l-izâm fazîletlü Mahmud Efendi b. ( ) ve müşârün-ileyh Birâderzâde Mustafa Efendi b. el-merhûm Ahmed Efendi li-ecli’ş-şehâde meclis-i ma‘kūd-ı mezbûra hâzırân [olup] isre’l-istişhâd fi’l-hakīka Ebû Said Efendizâde demekle şehîr merhûm-ı müşârün-ileyh Feyzullah Efendi hazretleri hayâtında [dâr-ı bekāya] intikālinden altı ay mukaddem bi-emrillâhi te‘âlâ kazâ-i nahb ettiğimde [sülüs-i] malımdan işbu müdde‘î-i mezbûr Sunullah Çelebi’ye yüz guruş verile deyü huzûrumuzda vasiyet edip musırran-aleyhâ rıhlet ettiklerinde sülüs-i terekesi meblağ-ı mûsâ-bihe vâfî ve kâfîdir biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mâ-vaka‘a kayd-şüd. Fî 7 min-Recebi’l-ferd sene 1110 Şuhûdü’l-hâl: Eş-şâhidûnü’s-sâbikūn.