Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 1028 Hüküm no: 842 Orijinal metin no: [192a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah Efendi’nin Dergâh-ı âli Yeniçerilerinin Doksan Birinci Cemaati Para Vakfı’nda olan devâtın kendisine ait olduğunu ispat ettiği Mahmiye-i İstanbul’da Hoca Kasım Gönânî mahallesinde sâkin iken bundan akdem vefât eden İzmirlizâde Ahmed Efendi b. Mehmed’in evlâd-ı sıgārının vasîleri ve li-ebeveyn ammileri bâ‘isü’l-kitâb Abdullah Efendi mahfil-i kazâda mahmiye-i mezbûrede Karagümrük kurbünde Dâye Hatun mahallesi ahâlîsinden olup mahrûse-i Edirne’de müsâfiren sâkin iken bundan akdem vefât eden Balizâde demekle şehîr Mehmed Efendi b. Habib Efendi’nin sagīr oğulları Mehmed Said ve Mehmed Reşid’in tesviye-i emrlerine kıbel-i şer‘den mansûb vasîleri fahrü’l-kuzât Nimetullah Efendi b. el-Hâc Mehmed Efendi b. Bali Efendi tarafından husûs-ı âti’l-beyânda vekîl olduğu merhûm-ı mezbûrun etbâ‘ından Yusuf Çelebi b. Abdullah ve Mustafa Beşe b. Ahmed şehâdetleriyle mahzar-ı hasm-ı câhidde şer‘an sâbit ve sübût-ı vekâletine hükmolunan Ahmed Çelebi b. Abdurrahman hâzır iken müteveffâ-yı mezbûr Mehmed Efendi’nin dâyinlerinden Dergâh-ı âlî yeniçerilerinin doksan bir cemâ‘at odası mühimmâtına mevkūfe nukūda bi’l-fi‘il mütevellî olup zikri âtî devâta yedinde rehin olmak üzere vaz‘-ı yed eden Hasan Ağa b. Mustafa mahzarında üzerine da‘vâ ve takrîr-i kelâm edip müteveffâ-yı mezbûr Balizâde Mehmed Efendi b. Habib Efendi hayâtında bin yüz beş senesi Muharremi gurresinde eytâm-ı mezbûr malından benim yedimden elli guruş istidâne ve kabz ve mukābelesinde işbu sîm zincirli ve sîm makta‘lı abanos devâtını bana rehin vaz‘ u teslîm ben dahi irtihân ve kabz u kabûl eylediğimden sonra meblağ-ı merkūmun on iki buçuk guruşunu yedinden kabz edip bâkī otuz yedi buçuk guruş mukābelesinde yedimde rehin iken zikr olunan devâtı alâ-tarîkı’l-isti‘âre benden kabz edip kable’l-fek mütevellî-i mezbûr yedine rehin vaz‘ eylemiş suâl olunup kasr-ı yedine tenbîh olunmak matlûbumdur dedikde gıbbe’s-suâl mütevellî-i mezbûr cevâbında müteveffâ-yı mezbûr Balizâde Mehmed Efendi bin yüz yedi Rebî‘ülevveli gurresinde mal-ı vakfdan benim yedimden istidâne eylediği yüz yirmi guruş mukābelesinde zikr olunan devâtı sâir eşyâsıyla bana rehin vaz‘ etmişdir deyü vaz‘-ı yedini ikrâr ve mukaddemâ müdde‘î-i mezbûra rehin vaz‘ eylediği ma‘lûmum değildir deyicek müdde‘î-i mezbûrdan müdde‘âsına beyyine taleb olundukda udûl-ı Müslimînden mahmiye-i mezbûre[de] Ali Paşa-i atîk mahallesinde sâkin Mehmed Çelebi b. Sadık ve zikr olunan Hoca Kasım Gönânî mahallesinde sâkin diğer Mehmed Çelebi b. Ahmed li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûr Balizâde Mehmed Efendi b. Habib Efendi hayâtında bin yüz beş senesi Muharremi gurresinde zikr olunan eytâm malından işbu müdde‘î-i mezbûr yedinden elli guruş istidâne ve kabz edip mukābelesinde işbu sîm zincirli ve sîm makta‘lı abanos devâtı işbu müdde‘î-i mezbûra rehin vaz‘ u teslîm edip ol dahi ba‘de’l-kabz yine müteveffâ-yı mezbûra huzûrumuzda i‘âde ve teslîm [ve] müteveffâ-yı mezbûr ahz u kabz eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebince zikr olunan devâtı müdde‘î-i mezbûra teslîme mütevellî-i mezbûra ba‘de’t-tenbîh mâ-vaka‘a kayd-şüd. Fî 6 min-Receb sene 1110 Şuhûdü’l-hâl: Mukayyid Mustafa Efendi b. ( ), es-Seyyid Abdülmuti Efendi, Murad Efendi b. Hüseyin Ağa, Şeyhzâde Ahmed Efendi, İbrahim Çelebi b. Mehmed, Hasan Çelebi b. Abdullah ve gayruhum mine’l-huzzâr.