Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 1027 Hüküm no: 841 Orijinal metin no: [191b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer Çelebi’nin vefat eden Ayşe Hatun’un vasisi olduğunu ispat ettiği Mahmiye-i İstanbul’da Kâtibkasım mahallesinde sâkine iken bundan akdem vefât eden Âişe Hatun bt. İbrahim b. Abdullah’ın vech-i âtî üzere vesâyâsını tenfîze vasiyy-i muhtârı olduğunu iddi‘â eden hâfızü’l-kitâb Ömer Çelebi b. Mustafa meclis-i şer‘-i hatîr-ı lâzımü’t-tevkīrde müteveffât-ı mezbûrenin zâhirde zevc-i metrûku Ahmed Bey’den gayrı vâris-i ma‘rûfu olmamak vechi üzere terekesinin nısfına vâzı‘u’l-yed olup mahmiye-i mezbûrede bi’l-fi‘il Beytülmâli’l-hâs emîni olan fahrü’l-akrân Mustafa Ağa b. Abdülmennan b. Abdullah tarafından husûs-ı âti’l-beyânda müseccel vekîli ve kıbel-i şer‘den husûmet ve redd-i cevâba me’zûn olan Mehmed Çelebi b. Mustafa mahzarında üzerine da‘vâ ve takrîr-i kelâm edip müteveffât-ı mezbûre Âişe Hatun bt. İbrahim b. Abdullah hâl-i marazında fevti günü bi-emrillâhi te‘âlâ kazâ-i nahb eylediğimde cemî‘ terekemin sülüsü[nü] ahz ü kabz edip bin bir akçe iskāt-ı salâtım içün devrolunup fukarâya tasadduk oluna ve eyyâm-ı mu‘tâdede tabh-ı ta‘âm ve it‘âm-ı fukarâ ve sulehâ oluna ve malik olduğum bir Mushaf-ı şerîf dahi vakf olup talebe-i ilimden bir müstahıkka verile ve bir Mushaf-ı şerîf dahi iştirâ olunup müstahıkkından birine verile ve fazla kalırsa hamele-i Kur’ân’dan müstahıkkına verilip rûhum [192a] içün hatm-i şerîf tilâvet ettirile deyü vasiyet edip tenfîzine ve sülüsânından zevcim mezbûr Ahmed Bey’in nısf hissesi verildikden sonra bâkīsi li-ümmin kız karındaşım olup mahrûse-i Edirne’de sâkine Hadîce Hatun bt. Hamza’ya îsâle beni vasiyy-i muhtâr nasb ü ta‘yîn ettikde ben dahi muvâcehesinde ba‘de’l-kabûl musırraten-aleyhâ fevt oldukda tenfîz-i vesâyâ murâd eylediğimde vekîl-i mezbûr mâni‘ olur suâl olunsun dedikde gıbbe’s-suâl vekîl-i mezbûr cevâbında müvekkilinin vech-i muharrer üzere terekeye vaz‘-ı yedini ikrâr ve müdde‘î-i mezbûrun vech-i meşrûh üzere müdde‘âsını inkâr edicek müdde‘î-i mezbûrdan sıdk-ı makāline beyyine taleb olundukda udûl-ı ahrâr-ı ricâl-i Müslimînden mahalle-i mezbûre sükkânından Mehmed Ağa b. Hüseyin ve diğer Mehmed Çelebi b. Hüseyin ve İbrahim Çelebi b. Mehmed li-ecli’ş-şehâde meclis-i şer‘a hâzırûn olup isre’l-istişhâd fi’l-hakīka müteveffât-ı mezbûre Âişe Hatun bt. İbrahim b. Abdullah hâl-i marazında fevti günü bi-emrillâhi te‘âlâ kazâ-i nahb eylediğimde cemî‘ terekemin sülüsünü ahz ü kabz edip bin bir akçesi iskāt-ı salâtım içün devrolunup fukarâya tasadduk oluna ve eyyâm-ı mu‘tâdede tabh-ı ta‘âm ve it‘âm-ı fukarâ ve sulehâ oluna ve malik olduğum bir Mushaf-ı şerîf dahi vakf olup talebe-i ilimden bir müstahıkkına verile ve bir Mushaf-ı şerîf dahi iştirâ olunup müstahıkkından birine verile ve fazla kalırsa hamele-i Kur’ân’dan müstahıkkına verilip rûhum içün hatm-i şerîf tilâvet ettirile deyü huzûrumuzda vasiyet edip tenfîzine ve bâkī sülüsânından zevcim mezbûr Ahmed Bey’in nısf hissesi verildikden sonra bâkīsini li-ümmin kız karındaşım olup mahrûse-i Edirne’de sâkine Hadîce Hatun bt. Hamza’ya îsâle mezbûr Ömer Çelebi’yi vasiyy-i muhtâr nasb ü ta‘yîn ettikde ol dahi muvâcehesinde ba‘de’l-kabûl musırraten-aleyhâ fevt oldu biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mâ-vaka‘a kayd-şüd. Fî 2 min-Recebi’l-ferd sene 1110 Şuhûdü’l-hâl: Şemsi Efendi b. Emin Mehmed Efendi, Rûşenî Mehmed Efendi b. İbrahim, Hüseyin Ağa b. Halil, Abdi Efendi b. Hasan, Ramazan Çelebi b. Mehmed