Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 1030 Hüküm no: 844 Orijinal metin no: [192b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hatun’un miras davasında babası ve annesi ile sulh oldukları Husûs-ı âti’l-beyânın mahallinde ketb ü tahrîri iltimâs olunmağın savb-ı şer‘den me’zûnen irsâl olunan Mevlânâ Nikâtî Ali Efendi mahmiye-i İstanbul’da Denizabdal mahallesinde sâkin umdetü’l-müderrisîni’l-kirâm Süleyman Beyefendi’nin menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i nebevî eyledikde mahalle-i mezbûrede sâkin iken bundan akdem vefât eden Bozacızâde Ahmed Çelebi b. el-merhûm İsmail Efendi’nin verâseti li-ebin er karındaşı fahrü’l-küttâb İbrahim Efendi ile li-ümmin kız karındaşı Hadîce Hatun’a ve vâlidesi Gülbuy Hatun bt. Abdullah’a münhasıra ve tashîh meselesi altı sehmden olup sihâm-ı mezbûrenin bir sehmi vâlidesi mezbûre Gülbuy Hatun’a ve bir sehmi mezbûre Hadîce Hatun’a ve bâkī dört sehmi mezbûr İbrahim Efendi’ye isâbet eyledikden sonra zâtı mahalle-i mezbûre ahâlîsinden İmâm Mehmed Efendi b. Abdullah ve Mehmed Ağa b. Ali ta‘rîfleriyle mu‘arrefe olan mezbûre Hadîce Hatun meclis-i ma‘kūd-ı mezbûrda zâtı ta‘rîf-i şer‘î ile mu‘arrefe olan mezbûre Gülbuy Hatun ile kendi babası el-Hâc Ramazan Çelebi b. Mehmed mahzarında ikrâr-ı tâm ve takrîr-i kelâm edip li-ümmin karındaşım müteveffâ-yı mezbûr Ahmed Çelebi’nin terekesinden tashîh-i mezbûr üzere bir sehm hissem mukābelesinde bana isâbet eden iki bin guruşumu vâlidem mezbûre Gülbuy Hatun ile babam mezbûr el-Hâc Ramazan ahz u kabz ve kendi mesârifine sarfla istihlâk etmişlerdir deyü mezbûrlardan da‘vâ ve taleb eylediğimde da‘vâ-yı mezkûremden fâriğa olmak üzere beynimize muslihûn tavassut edip vâlidem mezbûre Gülbuy ile babam mezbûr el-Hâc Ramazan’ın ale’l-iştirâk yedlerinde mülk ve hakları olup mahalle-i mezbûrede vâki‘ bir tarafdan Ömer Efendi menzili ve bir tarafdan Hüseyin Beşe menzili ve bir tarafdan karındaşım mezbûr İbrahim Efendi menzili ve bir tarafdan tarîk-i âm ile mahdûd hâriciyesinde fevkānî üç bâb oda ve iki sofa ve dehliz ve bir bi’r-i mâ ve bir ahır ve bir kiler ve bir kenîf ve bir mikdâr bahçe ve dâhiliyesinde fevkānî üç bâb oda ve iki sofa ve bir kiler ve bir matbah ve bir kiler odası ve bir halvetli hamam ve bir kârgîr sagīr mahzen ve bir kenîfi müştemil mülk menzilin iki sehm-i şâyi‘ini tarafeynden îcâb ve kabûlü hâvî bey‘-i bâtt-ı sahîh-i şer‘î ile bin guruşa mezbûrlar bana bey‘ u teslîm ben dahi ber-vech-i muharrer iştirâ ve tesellüm ve kabz u kabûl eyleyip semeni olan meblağ-ı mezbûr bin guruşu mezbûrların zimmetlerinde olan iki bin guruşun bin guruşuna takas onlar dahi mukāssa ve kabûl edip meblağ-ı bâkī bin guruş talebinden ve sâir mîrâsa müte‘allık âmme-i da‘vâdan vâlidem mezbûre Gülbuy ile babam mezbûr el-Hâc Ramazan’ın zimmetlerini ibrâ-i âmm-ı katı‘u’n-nizâ‘la ibrâ ve iskāt eyleyip onlar dahi kezâlik menzil-i mezbûrun iki sehmine müte‘allık cemî‘ da‘vâdan benim zimmetimi ibrâ-i âmla ibrâ ve iskāt eylediler dedikde gıbbe’t-tesâduki’ş-şer‘î vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an mürsel Çukadâr Nasuh Beşe b. Abdullah ve Mehmed Çelebi b. Hüseyin ile meclis-i şer‘a gelip vukū‘u üzere inhâ ve takrîr etmeğin mâ-vaka‘a kayd-şüd. Fî 20 min-Recebi’l-ferd sene 1110 Şuhûdü’l-hâl: Mehmed Efendi b. Abdullah el-İmâm, Mehmed Ağa b. Mehmed, Mustafa Efendi b. Mehmed, Abdullah Beşe b. Mehmed, Hüseyin Çelebi b. Süleyman, Mehmed Çelebi b. Abdullah, Mustafa Beşe b. İdris.