Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 1031 Hüküm no: 845 Orijinal metin no: [192b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Balizade Mehmed Efendi’nin Rahime Hatun’un para vakfından borç aldığı Mahmiye-i İstanbul’da vâki‘ merhûme Rahime nâm sâhibetü’l-hayrın nukūd-ı mevkūfesine bi’l-fi‘il mütevellî olan işbu bâ‘isü’l-vesîka İbrahim Çelebi b. Halil mahfil-i kazâda mahrûse-i Edirne’de müsâfiren sâkin iken bundan akdem vefât eden Balizâde demekle şehîr Mehmed Efendi b. Habib Efendi’nin sagīr oğulları Mehmed Said ve Mehmed Reşid’in tesviye-i emrlerine taraf-ı şer‘-i kavîmden vasî nasb olunan fahrü’l-kuzât Nimetullah Efendi b. el-Hâc Mehmed Efendi tarafından husûs-ı âti’l-beyânda vekîl olduğu merhûm-ı mezbûrun etbâ‘ından Yusuf Çelebi b. Abdullah ve Mustafa Beşe b. Ahmed şehâdetleriyle mahzar-ı hasm-ı câhidde şer‘an sâbit olup sübût-ı vekâletine hükmolunan Ahmed Çelebi b. Abdurrahman mahzarında üzerine da‘vâ ve takrîr-i kelâm edip müteveffâ-yı mezbûr Balizâde Mehmed Efendi b. Habib Efendi’nin hatt ü hatmini hâvî ve bin yüz yedi senesi Rebî‘ülevveli gurresi târîhiyle müverrah işbu deyn temessüğü nâtık olduğu üzere müteveffâ-yı mezbûra mal-ı vakf-ı mezbûrdan kırk guruş idâne ve teslîm ol dahi istidâne ve kabz edip mukābelesinde eşyâ-i memlûkesinden işbu elvan alaca ve şalı yedi aded kapama ve bir cedîd köse(?) destâr ve bir billûr rığdân ve bir benefşe çuka kürk kabını bana rehin vaz‘ ve teslîm ben dahi irtihân ve kabz u kabûl eylediğimden sonra kable’l-edâ ve’l-fek fevt olmağın vekîl-i mezbûrdan suâl olunup edâ-i deyn ve fekk-i rehne tenbîh olunmak matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsına beyyine taleb olundukda udûl-ı ahrâr-ı ricâl-i Müslimînden mahmiye-i mezbûrede Karagümrük kurbünde Ali Paşa-i atîk mahallesinde sâkin Abdi Çelebi b. Abdülvahab ve merhûm-ı mezbûrun [193a] etbâ‘ından mezbûr Yusuf Çelebi b. Abdullah nâm kimesne li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûr Balizâde Mehmed Efendi b. Habib Efendi hayâtında işbu deyn temessüğü nâtık olduğu üzere müdde‘î-i mezbûr yedinden mal-ı vakf-ı mezbûrdan huzûrumuzda kırk guruş istidâne ve kabz edip işbu memlûkesinden işbu elvan alaca ve şalı yedi aded kapama ve bir cedîd destâr ve bir billûr rığdân ve bir benefşe çuka kürk kabını rehin vaz‘ ve teslîm mütevellî-i mezbûr dahi irtihân ve kabz u kabûl eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebince ba‘de’l-hükm mâ-vaka‘a kayd-şüd. Fî 6 min-Recebi’l-ferd sene 1110 Şuhûdü’l-hâl: Mukayyid Mustafa Efendi b. Mehmed, Murad Efendi b. Hüseyin Ağa, Şeyhzâde Ahmed Efendi b. el-merhûm Mehmed Efendi, İbrahim Çelebi b. Mehmed, Hasan Çelebi b. Abdullah, İbrahim Kethüdâ.