Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 1032 Hüküm no: 846 Orijinal metin no: [193a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Balizade Mehmed Efendi’nin Emine adlı kız çocuğuna borcu olduğunun tescil edildiği Mahmiye-i İstanbul’da Firuz Ağa mahallesinde sâkine iken bundan akdem vefât eden Emetullah Hatun’un li-ebeveyn kız karındaşı sagīre Emine’nin tesviye-i umûruna vasiyy-i mensûbu işbu bâ‘isü’l-kitâb İmâm Mehmed Efendi b. Ali mahfil-i kazâda mahmiye-i mezbûrede Karagümrük kurbünde Dâye Hatun mahallesi sükkânından olup mahrûse-i Edirne’de müsâfiren sâkin iken bundan akdem vefât eden Balizâde demekle şehîr Mehmed Efendi b. Habib Efendi’nin sagīr oğulları Mehmed Said ve Mehmed Reşid’in tesviye-i emrlerine kıbel-i şer‘den mansûb vasîleri fahrü’l-kuzât Nimetullah Efendi b. el-Hâc Mehmed Efendi b. Bali Efendi tarafından husûs-ı âti’l-beyânda vekîl olduğu merhûm-ı mezbûrun etbâ‘ından Yusuf Çelebi b. Abdullah ve Mustafa Beşe b. Ahmed şehâdetleriyle mahzar-ı hasm-ı câhidde şer‘an sâbit olup sübût-ı vekâletine hükmolunan <<İmâm Mehmed>> li-ümmin karındaşı Ahmed Çelebi b. Abdurrahman mahzarında üzerine da‘vâ ve takrîr-i kelâm edip müteveffâ-yı mezbûr Balizâde Mehmed Efendi b. Habib Efendi hayâtında hatt ü hatmini hâvî ve bin yüz sekiz Rebî‘ülevveli’nin on sekizinci günü târîhiyle müverrah işbu deyn temessüğü nâtık olduğu üzere mal-ı sagīre-i mezbûreden benim yedimden altmış dokuz guruş istidâne ve kabz edip mukābelesinde işbu altın tahtalı bir akreb sâ‘at ve mercanlı bir siyâh tesbîh ve beç taş bir yüzük ve Mehmed ismine bir zümrüd hâtem ve minalı pîrûze altın hâtem ve on zirâ‘ telli hatâyî ve bir Sakız cüzdânı ve bir şalî kuşağını bana rehin vaz‘ u teslîm ben dahi irtihân ve kabz u kabûl edip meblağ-ı merkūmu kable’l-edâ ve’l-fek fevt olmağla vekîl-i mezbûrdan suâl olunup edâ-i deyn ve fekk-i rehne tenbîh olunmak matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsına beyyine taleb olundukda udûl-ı ahrâr-ı ricâl-i Müslimînden mahmiye-i mezbûrede Molla Fenârî mahallesinde sâkin es-Seyyid Mustafa Çelebi b. Süleyman ve merhûm-ı [mezbûrun] etbâ‘ından mezbûr Yusuf Çelebi b. Abdullah li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûr Balizâde Mehmed Efendi b. Habib Efendi hatt ü hatmini hâvî ve târîh-i merkūm ile müverrah işbu deyn temessükü nâtık olduğu üzere işbu müdde‘î-i mezbûr yedinden sagīre-i mezbûre malından huzûrumuzda altmış dokuz guruş istidâne ve kabz edip mukābelesinde işbu altın tahtalı bir akreb sâ‘at ve mercanlı bir siyâh tesbîh ve beç taşı yüzük ve Mehmed ismine bir zümrüd hâtem ve minalı bir pîrûze yüzük ve on zirâ‘ telli hatâyî ve bir Sakız cüzdânı ve bir şalî kuşağını rehin vaz‘ u teslîm müdde‘î-i mezbûr dahi irtihân ve kabz u kabûl eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebince ba‘de’l-hükm mâ-vaka‘a kayd-şüd. Fî 6 min-Recebi’l-ferd sene 1110 Şuhûdü’l-hâl: Mukayyid Mustafa Efendi b. Mehmed, es-Seyyid Abdülmuti Efendi, Yusuf Efendi b. Kara Veli, Nuh Efendi b. Musa, Ahmed Çelebi b. Süleyman.