Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 1035 Hüküm no: 849 Orijinal metin no: [193b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Hattat Osman Efendi’nin Davud Bey’in para vakfına borcu olduğu Davud Bey nâm sâhibü’l-hayrın nukūd-ı mevkūfesine bi’l-fi‘il mütevellî olan bâ‘isü’l-kitâb İmâm Mehmed Efendi b. Receb meclis-i şer‘-i hatîr-ı lâzımü’t-tevkīrde mahmiye-i İstanbul’da Sancakdâr Hayreddin mahallesi ahâlîsinden olup bundan akdem vefât eden merhûm Hattat Osman Efendi b. Ali b. Sinan’ın evlâd-ı sıgārının tesviye-i emrlerine tashîhan li’s-sak vasî nasb olunan Hasan Çelebi b. Yusuf mahzarında üzerine da‘vâ ve takrîr-i kelâm edip müteveffâ-yı mezbûr Hattat Osman Efendi b. Ali b. Sinan bin yüz sekiz senesi Recebi gurresinde mal-ı vakf-ı mezbûrdan kırk guruş ikrâz ve teslîm ol dahi iktirâz ve kabz ve mesârifine sarfla istihlâk edip hattâ meblağ-ı mezbûr cihet-i mezbûreden vakf-ı mezbûra zimmetinde deyni olduğunu huzûr-ı Müslimînde ikrâr ve yedime hatt ü hatmini hâvî mu‘anven ve mersûm işbu deyn temessükünü verip meblağ-ı mezbûru kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan sıdk-ı makāline beyyine taleb olundukda udûl-ı ahrâr-ı ricâl-i Müslimînden mahalle-i mezbûre ahâlîsinden müteveffâ-yı mezbûrun karındaşı Ahmed Efendi b. Ali ve etbâ‘ından el-Hâc Mustafa b. Mehmed li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûr Hattat Osman Efendi b. Ali b. Sinan hâl-i kemâl-i sıhhatinde vakf-ı mezbûreden mütevellî-i merkūm Mehmed Efendi yedinden kırk guruş iktirâz ve kabz ve mesârifime sarfla istihlâk eyledim meblağ-ı mezbûr vakf-ı mezbûra zimmetimde deynimdir deyü huzûrumuzda ikrâr ve yedine işbu deyn temessükünü verdi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm mâ-vaka‘a kayd-şüd. Fî 22 min-Recebi’l-ferd sene 1110 Şuhûdü’l-hâl: Fahrü’l-müderrisîn es-Seyyid Abdülmuti Efendi, Ahmed Efendizâde Hüseyin Efendi, Fahrü’l-müderrisîn es-Seyyid Abdullah Efendi, İbrahim Çelebi b. Mehmed, Ahmed Çelebi b. Mehmed.