Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 1039 Hüküm no: 854 Orijinal metin no: [194b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aşçı Ahmed Bey’in vefat eden hanımı Ayşe’den ev hissesini Ömer Çelebi’ye sattığı Mahmiye-i İstanbul’da Kâtibkasım mahallesinde sâkine iken bundan akdem vefât eden Âişe Hatun bt. İbrahim’in verâseti zevc-i metrûku Aşçı Ahmed Bey b. Mehmed ile li-ümmin kız karındaşı Hadîce bt. Hamza’ya münhasıra olup lâkin müteveffât-ı mezbûre hâl-i marazında cemî‘ terekesinin sülüsünü vücûh-ı birr ü hayra vasiyet etmekle tashîh meselesi üç sehmden olup sihâm-ı mezbûrenin bir sehmi sülüs ve bir sehmi zevci mezbûr Ahmed Bey’e ve bir sehmi mezbûre Hadîce’ye isâbet ettikden sonra mezbûr Ahmed Bey meclis-i ma‘kūd-ı mezbûrda hâfızü’l-kitâb Ömer Çelebi b. Mustafa mahzarında ikrâr ve takrîr-i kelâm edip mahalle-i mezbûrede vâki‘ müteveffât-ı mezbûrenin ile’l-vefât mülk ve hakkı olup bir tarafdan Ali Çavuş Vakfı ve bir tarafdan Mustafa Ağa mülkü ve bir tarafdan ba‘zan Cin Ali ve ba‘zan Kapıcı Mehmed ve ba‘zan Râbia mülkü ve bir tarafdan tarîk-i âm ile mahdûd hâriciyede bir bâb sagīr oda ve dâhiliyesi fevkānî iki bâb oda ve bir sofa ve bir matbah ve tahtânî bir oda ve iki kenîf ve zât-ı eşcâr hadîkayı müştemil mülk menzilden tashîh-i mezbûr üzere bana isâbet eden bir sehm-i şâyi‘imi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile mezbûr Ömer Çelebi’ye yüz guruşa safka-i vâhide ile bey‘ u temlîk ve teslîm ol dahi iştirâ ve temellük ve kabûl ettikden sonra semeni olan meblağ-ı mezbûru yedinden tamâmen alıp kabz eyledim ba‘de’l-yevm menzil-i mahdûd-ı mezbûrun tashîh-i mezbûr üzere üç sehmde bir sehm-i şâyi‘i mezbûr Ömer Çelebi’nin mülk-i müşterâsı olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a kayd-şüd. Fî 14 min-Recebi’l-ferd sene 1110 Şuhûdü’l-hâl: Şems Ahmed Efendi b. Emin Mehmed Efendi, Rûşenî Mehmed Efendi b. İbrahim, Abdullah Çelebi b. ( ) Mukayyid, el-Hâc Süleyman Çukadâr, Ahmed Çelebi b. Süleyman.