Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 1038 Hüküm no: 853 Orijinal metin no: [194b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aşçı Ahmed Bey’in vefat eden hanımı Ayşe’den intikal eden miras hissesini vasiden teslim aldığı Mahmiye-i İstanbul’da Kâtibkasım mahallesinde sâkine iken bundan akdem vefât eden Âişe Hatun bt. İbrahim’in verâseti zevc-i metrûku Aşçı Ahmed Bey b. Mehmed ile kız karındaşı Hadîce Hatun’a münhasıra olup lâkin müteveffât-ı mezbûre cemî‘ terekesinin sülüsünü vücûh-ı birr ü hayra vasiyet etmekle tashîh meselesi üç sehmden olup sihâm-ı mezbûrenin bir sehmi sülüs ve bir sehmi zevci mezbûr Ahmed Bey’e ve bir sehmi mezbûre Hadîce Hatun’a isâbeti tahakkukundan sonra mezbûr Ahmed Bey meclis-i şer‘-i hatîrde hâfızü’l-kitâb müteveffât-ı mezbûrenin sülüsünden vesâyâsını tenfîze vasiyy-i muhtârı olmağla terekesine vaz‘-ı yed eden Ömer Çelebi b. Mustafa mahzarında ikrâr ve takrîr-i kelâm edip zevcem müteveffât-ı mezbûrenin tereke-i menkūlesinden ba‘de ihrâci’l-mesârif tashîh-i mezbûr üzere bana isâbet eden seksen beş guruşu tereke-i müteveffât-ı mezbûreden olmak üzere vasiyy-i mezbûr yedinden tamâmen alıp kabz edip ve müteveffât-ı mezbûrenin ile’l-vefât mülk ve hakkı olup mahalle-i mezbûrede vâki‘ menzilden tashîh-i mezbûr üzere bana isâbet [eden] bir sehm-i şâyi‘imi vasiyy-i mezbûr Ömer Çelebi’ye yüz guruşa bey‘ edip semeni olan meblağ-ı mezbûru vasî yedinden alıp kabz edip müteveffât-ı mezbûrenin terekesine müte‘allıka âmme-i da‘vâdan vasiyy-i mezbûr Ömer Çelebi’nin zimmetini ibrâ ve iskāt eyledim min-ba‘d mezbûr Ömer Çelebi ile vechen mine’l-vücûh da‘vâ ve nizâ‘ım yokdur dedikde gıbbe’t-tasdîkı’ş-şer‘î mâ-vaka‘a kayd-şüd. Fî 26 min-Recebi’l-ferd sene 1110 Şuhûdü’l-hâl: Şems Ahmed Efendi b. Emin Mehmed Efendi, el-Hâc Süleyman b. Mehmed Çukadâr, İbrahim Çelebi b. Mehmed, Ahmed Çelebi b. Süleyman, Ramazan Çelebi b. Mehmed, Mehmed Ağa b. Hüseyin, diğer Mehmed Çelebi b. Hüseyin.