Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 1043 Hüküm no: 857 Orijinal metin no: [195a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Leh asıllı cariye Ayşe’nin hür olduğunu ispat ettiği Husûs-ı âti’l-beyânın mahallinde istimâ‘ ve tahrîri içün savb-ı şer‘-i enverden bi’t-taleb me’zûnen irsâl olunan Mevlânâ es-Seyyid Abdülmuti Efendi umdetü’l-emâcid ve’l-a‘yân Mehmed Bey b. el-Vezîr el-merhûm Siyavuş Bey mahmiye-i İstanbul’da Sultan Bayezid Hân mahallesinde saraylarına varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i hatîr ettikde mahmiye-i mezbûrede Kalenderhane mahallesi ahâlîsinden olup medîne-i Mısır’da vefât eden Mevkūfât hulefâsından Hüseyin Efendi b. Hasan b. Abdullah’a rıkk-ı sâbıkını mu‘terife işbu orta boylu açık kaşlı elâ gözlü Lehiyyetü’l-asl Müslimetü’l-millet hâfızatü’l-vesîka Âişe bt. Abdullah ba‘de’t-ta‘rîfi’ş-şer‘î meclis-i ma‘kūd-ı mezbûrda müteveffâ-yı mezbûrun sagīre kızı Fâtıma’nın ve zevce-i metrûkesi fahrü’l-muhadderât Hümaşah Hatun’un batnında müstebîn hamlin vasiyy-i mansûbları olmağla terekesine vaz‘-ı yed eden mûmâ-ileyh Mehmed Bey mahzarında üzerine da‘vâ ve takrîr-i kelâm edip seyyidim müteveffâ-yı mezbûr Hüseyin Efendi b. Hasan hâl-i kemâl-i sıhhatinde mülkünde olduğum hâlde hasbeten lillâhi te‘âlâ beni malından tahrîr ve i‘tâk etmekle ben hürre olmuş iken vasiyy-i mûmâ-ileyh rık olup terekeden olmak üzere bana bi-gayr-ı hakkın vaz‘-ı yed eder suâl olunup sebîlim tahliye olunmak matlûbumdur dedikde gıbbe’s-suâl vasiyy-i müşârün-ileyh cevâbında mevsûfe-i mezbûreye terekeden olmak üzere vaz‘-ı yedini ikrâr lâkin vech-i meşrûh üzere müdde‘âsını inkâr edicek müdde‘iye-i mezbûreden sıdk-ı makāline beyyine taleb olundukda udûl-ı ahrâr-ı ricâl-i Müslimînden mârrü’z-zikr Sultan Bayezid mahallesi ahâlîsinden fahrü’l-ümerâ Abdurrahim Bey b. Abdülbaki Bey ve Kalenderhane mahallesi ahâlîsinden Haffâf İsmail Çelebi b. Ali li-ecli’ş-şehâde meclis-i ma‘kūd-ı mezbûra hâzırân [olup] isre’l-istişhâd fi’l-hakīka müteveffâ-yı mezbûr Hüseyin Efendi b. Hasan hâl-i kemâl-i sıhhatinde müdde‘iye-i mezbûre Âişe’yi mülkünde olduğu hâlde hasbeten lillâhi te‘âlâ huzûrumuzda malından tahrîr ve i‘tâk eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan Çukadâr el-Hâc Süleyman b. Mehmed ve İbrahim b. Mehmed ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd-şüd. Fî 22 min-Recebi’l-ferd sene 1110 Şuhûdü’l-hâl: Fahrü’l-eimmeti’l-kirâm İmâm-ı evvel Mustafa Efendi b. Hüseyin, Abdüllatif Bey b. Bâkī Bey, Mehmed Efendi b. Sadık, Kemâlzâde Mehmed Ağa b. el-Hâc Mehmed, Mustafa Bey b. Ömer, Derviş Mehmed Bey b. Mehmed Bey, Mahmud Çelebi b. Abdullah ve gayruhum.