Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 1044 Hüküm no: 858 Orijinal metin no: [195b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Ayşe Hanım’ın vasiyetinin icrâsı için evinin üçte birinin İbrahim Çelebi’ye satıldığı Mahmiye-i İstanbul’da Kâtibkasım mahallesinde sâkine iken bundan akdem vefât eden Âişe Hatun bt. İbrahim’in cemî‘ terekesinin sülüsü[nü] ahz u kabz edip vesâyâsını tenfîze bâ-hüccet-i şer‘iyye vasiyy-i muhtârı olan Ömer Çelebi b. Mustafa meclis-i şer‘-i hatîr-ı lâzımü’t-tevkīrde hâfızü’l-vesîka İbrahim Çelebi b. Mehmed mahzarında ikrâr ve takrîr-i kelâm edip müteveffât-ı mezbûrenin ile’l-vefât mülk ve hakkı olup mahalle-i mezbûrede vâki‘ bir tarafdan Ali Çavuş Vakfı ve bir tarafdan Mustafa Ağa mülkü ve bir tarafdan ba‘zan Hasan Çelebi ve ba‘zan Kapıcı Mehmed ve ba‘zan Râbia Hatun mülkleri ve bir tarafdan tarîk-i âm ile [mahdûd] hâriciyede bir sagīr oda ve dâhiliyede fevkānî iki bâb oda ve bir sofa ve bir matbah ve tahtânî bir oda ve iki kenîf ve bi’r-i mâ ve zât-ı eşcâr-ı müsmire ve hadîkayı müştemil menzilin sülüsü bey‘ olunup semeninden müteveffât-ı mezbûrenin vesâyâsı tenfîz olunmak lâzım gelmeğin bi’l-izni’ş-şer‘î [menzil-i] mahdûd-ı mezbûrun sülüsü münâdîlerden Mustafa b. Mehmed yediyle sûk-ı sultânîde ve mecma‘-ı nâs olan mevâzi‘de kirâr u mirâr nidâ ve müzâyede o[lunup] rağabât-ı nâs bi’l-külliye münkatı‘a oldukdan sonra mezbûr İbrahim Çelebi üzerinde seksen guruşda karâr edip ziyâde ile tâlib-i â[harı] zuhûr etmeyip ve meblağ-ı mezbûr yevm-i akdde sülüs-i menzil-i mezbûrun semen-i misli olmağla ben dahi menzil-i mezbûrun sülüs-i şâyi‘ini tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile mezbûr İbrahim Çelebi’ye vesâyetim hasebiyle seksen guruşa bey‘ u temlîk ol dahi iştirâ ve temellük ve kabûl eyledikden sonra semeni olan meblağ-ı mezbûru yedinden tamâmen alıp kabz eyledim ba‘de’l-yevm menzil-i mahdûd-ı mezbûrun sülüs-i şâyi‘i mezbûr İbrahim Çelebi’nin mülk-i müşterâsı olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a kayd-şüd. Fî 22 min-Recebi’l-ferd sene 1110 Şuhûdü’l-hâl: Şemsi Ahmed Efendi b. Emin Mehmed Efendi, el-Hâc Süleyman Çukadâr, Ramazan Çelebi b. Mehmed, Mehmed Ağa b. Hüseyin, diğer Mehmed Ağa b. Hüseyin Ahmed Çelebi b. Süleyman, Yusuf [b.] Abdullah.