Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 1045 Hüküm no: 860 Orijinal metin no: [195b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Çelebi’nin bir menzil hissesini Ömer Çelebi’ye sattığı Mahmiye-i İstanbul’da Molla Hüsrev mahallesinde sâkine iken bundan akdem vefât eden Âişe Ha[tun] bt. Mustafa’nın sadriye sagīre kızları Fâtıma ve Afife’nin babaları ve velîleri bâ‘isü’l-kitâb [Hüseyin Çelebi] b. Muharrem mahfil-i kazâda takrîr-i kelâm edip sagīretân-ı mezbûretâna vâlideleri müteveffât-ı mezbûreden [müntakil] mallarından her birine kadr-ı ma‘rûf nafaka ve kisve-bahâ farz ve takdîr olunmak matlûbumdur [dedikde] hâkim-i muvakkı‘-i sadr-ı kitâb tûbâ-lehû ve hüsnü-meâb efendi hazretleri sagīretân-ı mezbûretâna mal-ı müntakillerinden olmak üzere her para üç akçe hesâbınca her birine yevmî dörder akçe nafaka ve kisve-bahâ farz ve takdîr buyurup meblağayn-ı mezbûreyni levâzım-ı sagīretân-ı mezbûretâna harc ü sarfa ve inde’z-zarûre istidâneye ve lede’z-zafer mallarına rücû‘a mezbûr Hüseyin Çelebi’ye izin [vermeğin] mâ-vaka‘a kayd-şüd. Fî 28 min-Recebi’l-ferd sene 1110 Şuhûdü’l-hâl: Abdurrahman Efendi el-İmâm, İbrahim Efendi Vanî, Eyüb Çelebi, Hasan Çelebi Attâr, Hüseyin Beşe el-Muhzır ve gayruhum mine’l-huzzâr.