Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 1044 Hüküm no: 859 Orijinal metin no: [195b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Çelebi’nin menzil hissesini Ömer Çelebi’ye sattığı Mahmiye-i İstanbul’da Beyceğiz mahallesinde sâkin <> İbrahim Çelebi b. Mehmed meclis-i şer‘-i hatîr-ı lâzımü’t-tevkīrde hâfızü’l-vesîka Ömer Çelebi b. Mustafa mahzarında ikrâr ve takrîr-i kelâm edip mahmiye-i mezbûrede Kâtibkasım mahallesinde vâki‘ bir taraf[dan] Ali Çavuş Vakfı ve bir tarafdan Mustafa Ağa mülkü ve bir tarafdan ba‘zan Cin Ali ve ba‘zan Kapıcı Mehmed ve ba‘zan Râbia Hatun mülkleri ve bir tarafdan tarîk-i âm ile mahdûd dâhiliyesi fevkānî iki bâb oda ve bir sofa ve bir matbah ve tahtânî bir oda ve bi’r-i mâ ve iki kenîf ve zât-ı eşcâr-ı müsmire hadîkayı müştemil menzilin sülüs-i şâyi‘i işbu yedimde olan hüccet-i şer‘iyye mûcebince akd-i âti’z-zikrin sudûruna değin mülk ve hakkım olmağla menzil-i mahdûd-ı mezbûrun sülüs-i şâyi‘ini mezbûr Ömer Çelebi’ye tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile seksen beş guruşa bey‘ u temlîk ol dahi iştirâ ve temellük ve kabûl ettikden sonra semeni olan meblağ-ı mezbûru yedinden tamâmen alıp kabz eyledim ba‘de’l-yevm menzil-i mahdûd-ı mezbûrun sülüs-i şâyi‘i mezbûr İbrahim Çelebi’nin mülk-i müşterâsıdır keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a kayd-şüd. Fî 26 min-Receb sene 1110 Şuhûdü’l-hâl: Şemsi Ahmed Efendi b. Mehmed Emin Efendi, el-Hâc Süleyman Çukadâr, Mehmed Ağa b. Hüseyin, Ramazan Çelebi b. Mehmed, diğer Mehmed Çel[ebi] b. Hüseyin.