Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 47 Hüküm no: 2 Orijinal metin no: [1b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mahmud Odabaşı’nın çocuklarının üzerine vasi ve nazır tayini Mahmiye-i İstanbul’da Hoca Kasım Gönânî mahâllesinde sâkin iken bundan akdem vefât eden Mahmud Odabaşı b. Murad’ın verâseti zevce-i menkû[ha]-i metrûkesi Hadîce Hatun bt. Abdullah ile sulbî sagīr oğlu Mehmed’e ve sulbiye kebîre kızları olup medîne-i Sakız’da sâkine Rabia Hatun ve Fâtıma Hatun’a münhasıra olduğu lede’ş-şer‘ mütehakkık oldukdan sonra sagīr-i mezbûr Mehmed’in tesviye-i umûruna müdde‘iyetân-ı mezbûretân Rabia Hatun ve Fâtıma Hatun’un hisse-i ırsiyelerini ahz u kabz ve zabt u hıfza savb-ı şer‘-i mutahhardan bir vasî nasb u ta‘yîn olunmak lâzım ve mühim olmağın emânet ve istikāmet ile ma‘rûf ve mevsûf idiğini zeyl-i vesîkada mastûrü’l-esâmi Müslimîn haberleriyle müte‘ayyen olan müteveffâ-yı mezbûrun li-ebeveyn karındaşı işbu hâfızü’l-kitâb Ahmed Bey ibnü’l-mezbûr Murad’ı hâkim-i muvakkı‘-ı sadr-ı kitâb bi-tevkī‘ihi’r-refî‘i’l-müstetâb tûbâ-lehû ve hüsnü-meâb efendi hazretleri sagīr-i mezbûrun vakt-i rüşd ve sedâdına varınca tesviye-i umûruna müdde‘iyetân-ı mezbûretân Rabia Hatun ve Fâtıma Hatun’un hisse-i ırsiyelerini ahz u kabz ve zabt u hıfza vasî ve üzerine Abdullah Ağa b. Mehmed’i hasbî nâzır nasb u ta‘yîn buyurduklarında onlardan her biri dahi vesâyet ve nezâret-i mezbûreyi kabûl ve merâsimini edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fî 23 Cumâdelûlâ sene 1143. Şuhûdü’l-hâl: Ahmed Çelebi b. İsmail, Ahmed Çelebi b. Hasan, el-Hâc İbrahim b. Hüseyin, Mustafa Çelebi b. el-Hâc Hasan.