Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 53 Hüküm no: 10 Orijinal metin no: [3a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un Hac yolunda vefat eden Ahmed Çavuş’un terekesinden hakkını aldığı Husûs-ı âti’l-beyanın mahâllinde ketb ü tahrîri için bi’l-iltimâs savb-ı şer‘-i enverden Mevlânâ es-Seyyid Mahmud Efendi irsâl olunup ol dahi mahmiye-i İstanbul’da el-Hâc Bayram mahâllesi ahâlîsinden olup tarîk-i Hacc-ı şerîfde bundan akdem vefât eden el-Hâc Ahmed Çavuş b. Abdullah’ın menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun verâseti zevce-i menkûha-i metrûkesi Hâce Emine Hatun bt. Ali ile li-ebeveyn kız karındaşı olup vilâyet-i Rumeli’nde Karinâbâd kasabasında sâkine Âişe Hatun bt. Abdullah’a münhasıra ve tashîh-i meselesi dört sehmden olup sihâm-ı mezbûrenin bir sehmi zevcesi mezbûreye ve üç sehmi farzan ve redden merkūme Âişe Hatun’a isâbeti tahakkukundan sonra mezbûre Âişe Hatun bt. Abdullah b. Abdullah tarafından husûs-ı âti’l-beyanda ahz u kabz ve sulh u ibrâya vekîl olduğu zât-ı mezbûreyi ma‘rifet-i şer‘iyye ile ârifân kasaba-i mezbûre sükkânından Hüseyin Bey b. Halil ve İbrahim Efendi b. Mehmed şehâdetleriyle mahzar-ı hasm-ı câhidde sâbit ve sübût-ı vekâletine hükm-i şer‘î lâhık olan el-Hâc Ahmed Ağa b. Hasan meclis-i ma‘kūd-ı mezkûrda müteveffâ-yı mezbûrun zevce-i menkûha-i metrûkesi olmağla terekesine bi’l-verâse vâzı‘atü’l-yed olup zâtı ta‘rîf-i şer‘î ile mu‘arrefe olan bâ‘isetü’l-kitâb mezbûre Hâce Emine Hatun mahzarında üzerine da‘vâ ve takrîr-i kelâm edip müteveffâ-yı mezbûr el-Hâc Ahmed Çavuş Ağa’nın mülk menzil ve eşyâ bi’l-cümle terekesi tahrîr ve ba‘de-ihrâci’l-masârıf ve’d-düyûn ber-mûceb-i defter-i kassâm-ı askerî tashîh-i mezbûr üzere müvekkilem mezbûre Âişe Hatun’un hissesine isâbet eden bir yük yirmi bir bin dört yüz akçeyi mezbûrân Hâce Emine Hatun bana def‘ u teslîm ben dahi tereke-i müteveffâ-yı mezbûrdan olmak üzere vekâletim hasebiyle yedinden bi’t-tamâm ve’l-kemâl alıp kabz eyledim, meblağ-ı mezbûrdan yedimde ve zimmetimde bir akçe ve bir habbe bâkī kalmayıp müteveffâ-yı mezbûrun dâhil-i defter ve hâric ez-defter ve kalîl ü kesîr ve celîl ü hakīr bi’l-cümle ismi mâl ıtlâk olunur terekesine müte‘allıka âmme-i da‘vâ ve mutâlebât ve eymân [ve] muhâsamâtdan mezbûre Hâce Emine Hatun’un zimmetini bi’l-vekâle ibrâ-i âmm-ı kātı‘ü’l-hısâmla ibrâ ve ıskāt eyledim, ol dahi zevcim müteveffâ-yı mezbûrun bi’l-cümle terekesine müte‘allıka âmme-i de‘âvî ve mutâlebâtdan benimle müvekkilem merkūme Âişe’nin zimmetimizi ibrâ ve ıskāt eyledim dedikde mezbûre Hâce Emine Hatun dahi vekîl-i mezbûru cemî‘ kelimât-ı meşrûhasıyla bi’l-muvâcehe tasdîk ve bi’l-müşâfehe tasdîk eylediğin mevlânâ-yı mezbûr mahâllinde tahrîr ba‘dehû ma‘an mürsel el-Hâc İbrahim b. Hüseyin ve Mehmed Çelebi b. Ahmed ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fî 24 min-Cumâdelûlâ. Şuhûdü’l-hâl: Bostanî Mehmed Efendi b. Abdullah, es-Seyyid Mehmed Efendi b. (°) mukābele-i sipâh, el-Hâc Halil Ağa b. Ahmed, Ahmed Ağa b. Veli Efendi, el-Hâc Osman Çavuş