Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 52 Hüküm no: 9 Orijinal metin no: [2b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Nedim Ahmed Efendi’nin kızı Lebabe’ye nafaka takdiri Mahmiye-i İstanbul’da Mahmudpaşa Mahkemesi’nde nâib olup mahrûse-i Galata muzâfâtından kasaba-i Beşiktaş mahâllâtından Tekerlek Mustafa Çelebi mahâllesi ahâlîsinden olup bundan akdem intikāl-i dâr-ı bekā eden Nedim Ahmed Efendi b. Şeyh Mehmed Efendi’nin sulbiye sagīre kızı Lebabe’nin tesviye-i umûruna cânib-i şer‘den mansûb vasîsi işbu bâ‘isü’l-kitâb İbrahim Çelebi b. el-Hâc Mustafa talebiyle hâkim-i muvakkı‘-ı sadr-ı kitâb bi-tevkī‘ihi’r-refî‘i’l-müstetâb tûbâ-lehû ve hüsnü-meâb efendi hazretleri sagīre-i mezbûrenin nafaka ve kisvesi’çün babası merhûm-ı mezbûrdan müntakil vakf-ı akārâtı icâresinden yevmî otuz iki akçe sagīre-i mezbûrenin nafaka ve kisvesi’çün farz ve takdîr buyurup meblağ-ı mefrûz-ı mezbûr yevmî otuz iki akçeyi sagīre-i mezbûrenin nafaka ve kisve ve sâir levâzım-ı zarûriyesine harc u sarfa ve lede’l-hâce istidâneye ve inde’z-zafer mâlına rücû‘a vasiyy-i mezbûra izin birle mâ-vaka‘a bi’t-taleb ketb olundu. Fi’l-yevmi’l-hâmis aşer min-şehri Rebî‘i’l-âhir li-sene selâse ve erba‘în ve mi’e ve elf. Şuhûdü’l-hâl: Mustafa b. el-Hâc Musa, İsmail Çelebi b. İbrahim, İbrahim Çelebi b. Receb, es-Seyyid Ali Çelebi b. Osman, Mustafa Çelebi b. Hasan