Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 57 Hüküm no: 13 Orijinal metin no: [4a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’da vefat eden Mehmed Ağa’nın hayattayken terekesini Kahire’deki ailesine göndermek üzere Silahşor Mehmed Ağa’yı vasi tayin ettiği Husûs-ı âti’l-beyanın mahâllinde istimâ‘ ve tahrîri için savb-ı şer‘-i enverden mezûnen Mevlânâ el-Hâc İbrahim Efendi irsâl olunup ol dahi mahmiye-i İstanbul’da Hoca Paşa mahâllesinde sâkin İbrahim Ağa b. Abdullah’ın menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde Mısr-ı Kāhire mahâllâtından Kaysun mahâllesi ahâlîsinden olup mezbûr İbrahim Ağa’nın menzilinde sâkin iken bundan akdem vefât eden Mehmed Ağa b. Abdullah’ın ber-vech-i âtî vasiyy-i muhtârı olduğunu iddi‘â eden bâ‘isü’l-kitâb fahrü’l-akrân Silahşor Ahmed Ağa b. Abdullah meclis-i ma‘kūd-ı mezkûrda müteveffâ-yı mezbûrun zâhir[de] vâris-i ma‘rûfu olmayıp terekesi cânib-i beytülmala âid olmak zu‘muyla mahmiye-i mezbûrede bi’l-fi‘il beytülmal-ı hâs emîni olup terekesine bi’l-emâne vaz‘-ı yed ve ber-vech-i âtî husûmet ve redd-i cevâba kıbel-i şer‘den mezûn olan fahrü’l-akrân Mehmed Ağa b. Ali tarafından husûs-ı âti’l-beyanda vekîl-i müsecceli Osman Çelebi b. Ebubekir mahzarında üzerine da‘vâ ve takrîr-i kelâm edip müteveffâ-yı mezbûr Mehmed Ağa b. Abdullah b. Abdullah hayâtında fevtinden üç gün mukaddem bi-emrillâhi te‘âlâ vefât eylediğimde cemî‘ terekem ve zimem-i nâsda olan hukūkum ahz u kabz olunup vech-i mesnûn üzere levâzım-ı techîz ve tekfînim görülüp düyûn-ı müsbetem edâ olundukdan sonra bâkī terekem mârrü’z-zikr Mısr-ı Kāhire’de Kaysun mahâllesinde sâkine zevce-i menkûha-i metrûkesi Hadîce Hatun bt. Mahadim Heykel ile sagīr oğlu Ahmed’e îsâl oluna deyü vasiyet edip tenfîzine beni huzûr-ı Müslimînde vasiyy-i muhtâr ve üzerime işbu hâzır bi’l-meclis Kasım Ağa b. Abdullah’ı nâzır nasb u ta‘yîn edip biz dahi vesâyet ve nezâreti muvâcehesinde ba‘de’l-kabûl musırran-aleyhâ fevt olmağla ber-vech-i muharrer tenfîz-i vesâyet murâd eylediğimde vekîl-i mezbûr mâni‘ olur, suâl olunsun dedikde gıbbe’s-suâl vekîl-i mezbûr cevâbında müvekkil-i mûmâ-ileyhin tereke-i müteveffâ-yı mezbûra bi’l-emâne vaz‘-ı yedini ikrâr ve müdde‘î-i mezbûrun ber-vech-i mübeyyen müdde‘âsını inkâr edicek müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden mahrûse-i Galata muzâfâtından kasaba-i Kasım Paşa’da sâkin Ömer Efendi b. Abdullah ve Mustafa Bey b. Şahin ve mahmiye-i mezbûrede Haseki Hamamı kurbünde sâkin Mehmed Ağa b. İbrahim li-ecli’ş-şehâde meclis-i ma‘kūd-ı mezkûrda hâzirûn olup isre’l-istişhâd fi’l-hakīka müteveffâ-yı mezbûr Mehmed Ağa b. Abdullah b. Abdullah hayâtında fevtinden üç gün mukaddem bi-emrillâhi te‘âlâ vefât eylediğimde cemî‘ terekem ve zimem-i nâsda olan hukūkum ahz u kabz olunup düyû[n-ı] müsbetim edâ olundukdan sonra bâkī kalan terekem mârrü’z-zikr Mısr-ı Kāhire mahâllâtından Kaysun mahâllesinde sâkine zevce-i menkûham Hadîce Hatun bt. Mahadim Heykel ile sagīr oğlum Ahmed’e irsâl oluna deyü vasiyet edip tenfîze işbu müdde‘î-i mezbûr Ahmed Ağa’yı huzûrumuzda vasiyy-i muhtâr ve üzerine işbu hâzır bi’l-meclis Kasım Ağa b. Abdullah’ı nâzır nasb u ta‘yîn edip onlar dahi vesâyet ve nezâreti muvâcehesinde ba‘de’l-kabûl musırran-aleyhâ vefât eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm vâki‘ hâli mevlânâ-yı mezbûr mahâllinde tahrîr [ve ma‘an] mürsel Hasan b. Mustafa ve Ahmed b. Mehmed ile meclis-i şer‘a gelip Fî 23 min-Cumâdelûlâ sene 1143. Şuhûdü’l-hâl: el-Hâc Mustafa b. Mehmed, Mehmed Ağa b. Musa, Ali Çelebi b. Abdullah, İbrahim Ağa b. Abdullah, Abdullah Ağa b. Abdurrahman