Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 61 Hüküm no: 19 Orijinal metin no: [4b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ali Efendi’nin Seyfi Çelebi’ye olan borcunun terekeden ödenmesi Kezâlik akd-i meclis-i şer‘-i şerîf ettikde işbu bâ‘isü’l-kitâb Seyfi Çelebi b. Ahmed meclis-i ma‘kūd-ı mezbûrda müteveffâ-yı mezbûrun zevce-i menkûha-i metrûkesi ve sulbî sagīr oğlu Mustafa ve sulbiye sagīre kızı Fâtıma’nın vâlideleri ve tesviye-i emrlerine kıbel-i şer‘den mansûbe vasiyyeleri olup zâtı ta‘rîf-i şer‘î ile mu‘arrefe ve terekesine bi’l-verâse ve bi’l-vesâye vâzı‘atü’l-yed olan Âişe Hatun bt. Ali ile müteveffâ-yı mezbûrun babası mezbûr Mustafa Çelebi b. İsa mahzarlarında üzerlerine da‘vâ ve takrîr-i kelâm edip müteveffâ-yı mezbûr Ali Efendi b. Mustafa b. İsa zimmetinde cihet-i karz-ı şer‘îden yüz elli guruş hakkım olup hattâ müteveffâ-yı mezbûr hâl-i kemâl-i sıhhatinde fevtinden altı ay mukaddem meblağ-ı mezbûr cihet-i merkūmeden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim suâl olunsun dedikde [5a] gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden mahâlle-i mezbûre sükkânından Ahmed Beşe b. Ali ve Duhâncı Feyzullah Çelebi b. Abdi ve Berber Hasan Çelebi b. Mehmed li-ecli’ş-şehâde meclis-i ma‘kūd-ı mezkûra hâzirûn olup isre’l-istişhâd fi’l-hakīka müteveffâ-yı mezbûr Ali Efendi b. Mustafa b. İsa hâl-i kemâl-i sıhhatinde fevtinden altı ay mukaddem işbu müdde‘î-i mezbûr Seyfi Çelebi’ye cihet-i karz-ı şer‘îden yüz elli guruş zimmetinde vâcibü’l-edâ deyni olduğunu huzûrumuzda ikrâr ve bizi işhâd eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm vâki‘ hâli ilâ âhırihî. Fi’l-yevmi’s-sânî ve’l-ışrîn min-Cumâdelûlâ sene 1143. Şuhûdü’s-sâbıkūn