Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 60 Hüküm no: 18 Orijinal metin no: [4b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ali Efendi’nin hanımı Ayşe Hatun’a terekeden mehrinin ödenmesi Husûs-ı âti’l-beyanın mahâllinde istimâ‘ ve tahrîri için savb-ı şer‘-i enverden mezûnen Mevlânâ Salih Efendi irsâl olunup ol dahi mahmiye-i İstanbul’da İsmail Ağa mahâllesi ahâlîsinden olup Küplü kasabasında nâib iken bundan akdem vefât eden Ali Efendi b. Mustafa Çelebi’nin menziline varıp zeyl-i kitâbda muharrerü’l-esâmi Müslimîn huzûrlarından akd-i meclis-i şer‘-i şerîf ettikde müteveffâ-yı mezbûrun zevce-i menkûha-i metrûkesi olup zâtı ta‘rîf-i şer‘î ile mu‘arrefe olan işbu bâ‘isetü’l-kitâb Âişe Hatun bt. Ali meclis-i ma‘kūd-ı mezbûrda müteveffâ-yı mezbûrun babası ve sulbî sagīr oğlu Mehmed’in tesviye-i umûruna kıbel-i şer‘den mansûb vasîsi olmağla terekesine bi’l-verâse ve bi’l-vesâye vâzı‘ü’l-yed olan mezbûr Mustafa Çelebi b. İsa mahzarında üzerine da‘vâ ve takrîr-i kelâm edip zevcim müteveffâ-yı mezbûr Ali Efendi b. Mustafa b. İsa zimmetinde mütekarrer ve ma‘kūdün-aleyh dört bin akçe mehr-i müeccel hakkım olup hattâ müteveffâ-yı mezbûr hâl-i kemâl-i sıhhatinde fevtinden bir sene mukaddem meblağ-ı mezbûr cihet-i merkūmeden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim, suâl olunsun dedikde, gıbbe’s-suâl ve’l-inkâr müdde‘iye-i mezbûreden müdde‘âsına beyyine taleb olundukda udûl-i ahrâr-ı ricâl-i Müslimînden mahmiye-i mezbûrede Camcılar mahâllesinde sâkin Hâfız Mehmed Efendi b. Ali ve müteveffâ-yı mezbûrun etbâ‘ından Seyfi Çelebi b. Ahmed li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffâ-yı mezbûr Ali Efendi b. Mustafa b. İsa hâl-i kemâl-i sıhhatinde fevtinden bir sene mukaddem zevcesi işbu müdde‘iye-i mezbûre Âişe Hatun’a zimmetinde mütekarrer ve ma‘kūdün-aleyh dört bin akçe mehr-i müeccel vâcibü’l-edâ deyni olduğunu huzûrumuzda ikrâr ve bizi işhâd eyledi, biz bu husûsa bu vech-i üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın ba‘de’l-tahlîfi’ş-şer‘î mûcebiyle ba‘de’l-hükm vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan Mustafa Çelebi b. el-Hâc Hasan ve Ali Çelebi b. Abdullah ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fî 20 min-Cumâdelûlâ sene 1143. Şuhûdü’l-hâl: el-Hâc Mustafa b. Hasan, Hasan Efendi b. Halil, Berber Mehmed Çelebi b. Mustafa, Mehmed Çelebi b. Osman, Hasan Çelebi b. Mehmed, Mustafa Çelebi b. el-Hâc Hasan