Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 66 Hüküm no: 23 Orijinal metin no: [5b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mataracı Mustafa Ağa’nın oğlu Ahmed’e annesinin vasi tayini Mahmiye-i İstanbul’da Çukur Meydan kurbünde Yeni mahâllede sâkin iken bundan akdem vefât eden Mataracı el-Hâc Mustafa Ağa b. Ahmed’in sulbî sagīr oğlu Ahmed’in tesviye-i umûruna kıbel-i şer‘den bir vasî nasbı lâzım ve mühim olmağın emânet ile ma‘rûf ve istikāmet ile ma‘rûfe ve her vechile vesâyet uhdesinden gelmeye kādire idiği zeyl-i kitâbda muharrerü’l-esâmi Müslimîn haberleriyle lede’ş-şer‘i’ş-şerîf zâhir ve nümâyân olan sagīr-i mezbûrun vâlidesi işbu bâ‘isetü’l-kitâb Hadîce Hatun bt. Abdullah’ı hâkim-i muvakkı‘-ı sadr-ı kitâb bi-tevkī‘ihi’r-refî‘i’l-müstetâb tûbâ-lehû ve hüsnü-meâb efendi hazretleri sagīr-i mezbûrun vakt-i rüşd ü sedâdına varınca tesviye-i umûruna vasî nasb u ta‘yîn buyurduklarında ol dahi vesâyet-i mezbûreyi kabûl ve hizmet-i lâzımesini edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fî 24 min-Cumâdelûlâ sene 1143. Şuhûdü’l-hâl: el-Hâc Halil Ağa b. Mehmed, Bektaş Çelebi b. Ali, Abdullah Ağa b. İbrahim, Ahmed Çelebi b. İsmail, el-Hâc Ahmed b. Mehmed