Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 66 Hüküm no: 24 Orijinal metin no: [6a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Yağcı Salih’in oğlu Ali’ye annesinin vasi tayin edildiği Mahmiye-i İstanbul’da Defterdâr Ahmed Çelebi mahâllesi ahâlîsinden olup Gözleve’den gelir iken esnâ-i tarîkde bundan akdem garîkan vefât eden Yağcı Salih Çelebi b. Ali’nin sulbî sagīr oğlu Ali’nin tesviye-i umûruna kıbel-i şer‘den bir vasî nasbı lâzım ve mühim olmağın emânet ile ma‘rûfe ve istikāmet ile mevsûfe ve her vechile vesâyet uhdesinden gelmeye kādire idiği zeyl-i kitâbda muharrerü’l-esâmi Müslimîn haberleriyle lede’ş-şer‘i’l-enver zâhir ve nümâyân olan sagīr-i mezbûrun vâlidesi bâ‘isetü’l-kitâb Saliha Hatun bt. Ali’yi hâkim-i muvakkı‘-ı sadr-ı kitâb bi-tevkī‘ihi’r-refî‘i’l-müstetâb tûbâ-lehû ve hüsnü-meâb efendi hazretleri sagīr-i mezbûrun vakt-i rüşd ü sedâdına varınca tesviye-i umûruna vasî nasb u ta‘yîn buyurduklarında ol dahi vesâyet-i mezbûreyi kabûl ve hizmet-i lâzımesini edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fi’l-yevmi’l-hâmis ve’l-ışrîn min-Cumâdelûlâ sene 1143. Şuhûdü’l-hâl: Salih Efendi b. Mehmed el-imâm, el-Hâc Süleyman b. Ali, Ahmed Çelebi b. Hüseyin, Mustafa Çelebi b. Süleyman, İsmail Çelebi b. Mehmed, Abdurrahman Çelebi b. Ali, Ahmed Çelebi b. İsmail, Hasan b. Ömer