Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 79 Hüküm no: 42 Orijinal metin no: [8b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Çelebi’nin vefat eden Kahveci Ömer’de olan alacağının terekesinden ödenmesi Uhbiret bimâ fîhi hurrire el-fakīr ileyhi te‘âlâ es-Seyyid Mehmed Said el-kassâmü’l-askerî bi-medîneti Kostantıniye -ufiye anhü- Husûs-ı âti’l-beyanın mahâllinde istimâ‘ ve tahrîri iltimâs olunmağın savb-ı şer‘-i enverden mezûnen Mevlânâ es-Seyyid Mahmud Efendi irsâl olunup ol dahi mahmiye-i İstanbul’da Vâlide Hanı kurbünde Dâye Hatun mahâllesinde sâkin iken bundan akdem vefât eden Kahveci el-Hâc Ömer b. Mustafa’nın menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde tüccâr tâifesinden bâ‘isü’l-kitâb Ahmed Çelebi b. Abdullah meclis-i ma‘kūd-ı mezkûrda müteveffâ-yı mezbûrun zevce-i menkûha-i metrûkesi olmağla terekesine bi’l-verâse vâzı‘atü’l-yed olup zâtı ta‘rîf-i şer‘î [ile] mu‘arrefe olan Fâtıma Hatun bt. Sunullah mahzarında üzerine da‘vâ ve takrîr-i kelâm edip müteveffâ-yı mezbûr Kahveci el-Hâc Ömer b. Mustafa b. Ömer zimmetinde cihet-i karz-ı şer‘îden iki yüz kırk iki buçuk guruş hakkım olup hattâ müteveffâ-yı mezbûr hâl-i kemâl-i sıhhatinde meblağ-ı mezbûr cihet-i merkūmeden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden mahmiye-i mezbûrede Kara Mustafa Paşa mahâllesinde sâkin İbrahim Efendi b. Ahmed ve Berber Süleyman Çelebi b. Mehmed li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffâ-yı mezbûr Kahveci el-Hâc Ömer b. Mustafa b. Ömer hâl-i kemâl-i sıhhatinde işbu müdde‘î-i mezbûr Ahmed Çelebi’ye cihet-i karz-ı şer‘îden iki yüz kırk iki buçuk guruş zimmetinde vâcibü’l-edâ deyni olduğunu huzûrumuzda ikrâr ve bizi işhâd eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm vâki‘ hâli mevlânâ-yı mezbûr mahâllinde tahrîr ve ba‘dehû ma‘an mürsel el-Hâc İbrahim b. Hüseyin ve Hasan Çelebi b. Hüseyin meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fî-gurreti şehri Rebî‘ülâhir sene 1143. Şuhûdü’l-hâl: İbrahim Odabaşı b. Abdullah, Mehmed Ağa b. İbrahim, el-Hâc Halil b. İbrahim, Mustafa Çelebi b. Osman, Hasan Ağa b. Abdullah, Mustafa Çelebi b. Abdullah, Ahmed Ağa b. Mehmed, Mustafa b. Ali