Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 79 Hüküm no: 41 Orijinal metin no: [8a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mehmed b. Osman’ın alacaklarını tahsil eden Mehmed Ağa’nın parayı varislere teslim ettiği Mahmiye-i İstanbul’da Tevkī‘î Cafer Çelebi mahâllesi ahâlîsinden olup vilâyet-i Rumeli’nde Praveşte kazâsında sâkin iken bundan akdem vefât eden es-Seyyid el-Hâc Mehmed b. Osman’ın sulbiye sagīre kızları Şerîfe Rukıye ve Şerîfe Havva’nın vâlideleri ve tesviye-i emrlerine cânib-i şer‘den mansûbe vasiyyeleri olup zâtı ta‘rîf-i şer‘î ile mu‘arrefe olan Emine Hatun bt. Abdullah meclis-i şer‘-i şerîf-i lâzımü’t-tevkīrde mahmiye-i mezbûrede Kalenderhâne mahâllesinde sâkin bâ‘isü’l-kitâb Mehmed Ağa b. Ahmed mahzarında bi’l-vesâye takrîr-i kelâm ve ta‘bîr ani’l-merâm edip sagīretân-ı mezbûretânın babaları müteveffâ-yı mezbûrun zikr olunan Praveşte kazâsında vâki‘ ma‘lûmü’l-esâmi kimesneler zimmetlerinde olan hukūkundan olup müteveffâ-yı mezbûrun medyûnunun kazâ-i mezbûreden bana îsâl için mezbûr Mehmed Ağa’ya alâ-tarîkı’l-emâne def‘ u teslîm eyledikleri iki yüz guruşu mezbûr Mehmed Ağa işbu meclis-i şer‘de tamâmen bana def‘ u teslîm edip ben dahi vesâyetim hasebiyle meblağ-ı mezbûru mezbûr Mehmed Ağa yedinden bi’t-tamâm ve’l-kemâl alıp kabz edip min-ba‘d meblağ-ı mezbûr iki yüz guruşdan mûdî‘-i mezkûr Mehmed Ağa yedinde ve zimmetinde bir akçe ve bir habbe bâkī kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 28 min-Cumâdelûlâ sene 1143. Şuhûdü’s-sâbıkūn