Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 88 Hüküm no: 52 Orijinal metin no: [10a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rumeli’deki görevine giderken vefat eden Mustafa Efendi’nin Ali Ağa’dan aldığı evin parasını tamamen ödemediğinden satışın iptali Mahmiye-i İstanbul’da Kapudan Sinan Paşa mahâllesi ahâlîsinden olup vilâyet-i Rumeli’nde mansûbu olan Angelikasrı’na gider iken esnâ-i tarîkde düyûnu terekesinden ezyed olduğu hâlde bundan akdem vefât eden es-Seyyid Mustafa Efendi b. es-Seyyid Lütfullah’ın düyûn-ı müsbetesini edâya cânib-i şer‘den vasî ve kayyım nasb olunan Abdullah Çelebi b. Mehmed meclis-i şer‘-i şerîf-i enverde mahmiye-i mezbûrede Bekir Paşa mahâllesinde sâkin işbu hâfızü’l-kitâb Ali Ağa b. Mustafa mahzarında bi’l-vesâye üzerine da‘vâ ve takrîr-i kelâm edip mezbûr Ali Ağa’nın yedinde mülkü olup zikr olunan Kapudan Sinan Paşa mahâllesinde vâki‘ bir tarafı Sandukī Abdi Çelebi ve bir tarafı el-Hâc Mustafa mülkü ve bir tarafı Afife Hatun tasarrufunda olan vakıf menzil ve bir tarafı tarîk-i âm ile mahdûd fevkānî ve tahtânî üç bâb oda ve dehliz ve bir bi’r-i mâ ve mültefitü’l-eşcâr bağçe ve kenîf ve havluyu müştemil mülk menzilini müteveffâ-yı mezbûr es-Seyyid Mustafa Efendi b. es-Seyyid Lütfullah b. Abdullah fevtinden altı ay mukaddem altı yüz yirmi guruşa bey‘-i bâtt-ı sahîh-i şer‘î ile bey‘ ve temlîk ol dahi ber-vech-i muharrer iştirâ ve temellük etmekle menzil-i mezkûr mülk-i müşterâsı oldukdan sonra mezbûr es-Seyyid Mustafa Efendi fevt olup menzil-i mahdûd-ı mezkûr terekesinden olmağla kabz ve bey‘ murâd eylediğimde mezbûr Ali Ağa menzil-i mezkûru bi-gayrı hakkın zabt edip bana teslîmden imtinâ‘ eder suâl olunsun dedikde gıbbe’s-suâl mezbûr Ali Ağa cevâbında fi’l-vâki‘ menzil-i mezbûru târîh-i merkūmda müteveffâ-yı mezbûr es-Seyyid Mustafa Efendi’ye altı yüz yirmi guruşa bey‘ eylediğini ikrâr lâkin bey‘-i mezkûr, mezbûr es-Seyyid Mustafa Efendi meblağ-ı mezbûrun üç yüz guruşunu mansabına gitmezden mukaddem teslîm üç yüz yirmi guruşunu mansabından irsâl etmek şartıyla vâki‘ olmağın şart-ı mezkûr ve ecel-i merkūm mechûl olup bey‘-i mezkûr fâsid olmağın menzil-i mezbûr yine yedimde mülküm olmak üzere kalmışdır deyü def‘le mukābele ve istintâk olunsun dedikde gıbbe’l-istintâk ve’l-inkâr husûs-ı mezkûrda ber-mûceb-i fetvâ-yı şerîf fesâd beyyinesi evlâ olmağla mezbûr Ali Ağa’dan def‘-i meşrûhuna beyyine taleb olundukda udûl-i ahrâr-ı ricâl-i Müslimînden zikr olunan Kapudan Sinan Paşa mahâllesi sâkinlerinden Mustafa Efendi b. Ali Çavuş ve Ahmed Ağa b. Mustafa ve İsmail Çavuş Ağa b. Hasan li-ecli’ş-şehâde meclis-i şer‘a hâzirûn olup işhâd olunduklarında fi’l-hakīka mezbûr Ali Ağa yedinde mülk ve hakkı olup zikr olunan Kapudan Paşa mahâllesinde vâki‘ bir tarafdan Sandukī Abdi Çelebi mülkü ve bir tarafı el-Hâc Mustafa mülkü ve bir tarafı Afife Hatun tasarrufunda olan vakıf menzil ve bir tarafı tarîk-i âm ile mahdûd fevkānî ve tahtânî üç bâb oda ve dehliz ve bir bi’r-i mâ ve mültefitü’l-eşcâr ve bağçe ve kenîf ve havluyu müştemil mülk menzilimi müteveffâ-yı mezbûr es-Seyyid Mustafa Efendi b. es-Seyyid Lütfullah b. Abdullah’a fevtinden altı ay mukaddem altı yüz yirmi guruşa bey‘ ve temlîk edip ol dahi semen-i mezkûrun üç yüz guruşunu mansabına gitmezden mukaddem teslîm ve üç yüz yirmi guruşunu mansabından irsâl etmek şartıyla huzûrumuzda iştirâ ve temellük eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle şart-ı mezkûrede ve ecel dahi mechûle olduğuna binâen bey‘-i mezkûrun fesâdına ba‘de’l-hükm vasiyy-i mezbûr menzil-i mezkûra müte‘allıka mezbûr Ali Ağa ile bî-vech mu‘ârazadan men‘ olundukdan sonra vasiyy-i mezbûr Abdullah Çelebi meclis-i şer‘de mezbûr Ali Ağa mahzarında bi’l-vesâye ikrâr ve takrîr-i kelâm edip müteveffâ-yı mezbûr es-Seyyid Mustafa Efendi’nin mezbûr Ali Ağa yedinde emânet olan ma‘lûmü’l-evsâf bir re’s Acemiyyetü’l-asl câriyesiyle bir zincirli altını mezbûr Ali Ağa bana def‘ u teslîm ben dahi vesâyetim hasebiyle yedinden ahz u kabz eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 24 min-Cemâziyelevvel sene 1143. Şuhûdü’l-hâl: Abdülkadir Efendi b. el-merhûm Abdullah Efendi, Abdülbaki Efendi b. Ahmed Efendi, el-Hâc Abdullah Efendi b. Esad, Mustafa Çelebi b. Hasan, Tahir Mehmed Efendi b. Mustafa imam-ı Mescid-i Simkeş, Ahmed Efendi b. Şücaeddin imam-ı Sinan Paşa, Mehmed Halîfe b. İbrahim, Mehmed b. Mustafa, Mehmed b. Ahmed ve gayruhum