Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 94 Hüküm no: 59 Orijinal metin no: [11a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haffaf Ahmed Çelebi’ye borçlu olarak vefat eden İbrahim Efendi’nin terekesinden bu paranın ödenmesi Husûs-ı âti’z-zikrin mahâllinde istimâ‘ ve tahrîri için savb-ı şer‘-i enverden mezûnen Mevlânâ Abdullah Efendi ibni’l-merhûm İbrahim Efendi irsâl olunup ol dahi mahmiye-i İstanbul’da Şeyh Ebulvefâ mahâllesinde sâkin iken bundan akdem vefât eden Gedikliler Kâtibi İbrahim Efendi b. Muslı’nın menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde haffâf tâifesinden işbu bâ‘isü’l-kitâb Ahmed Çelebi b. Mehmed meclis-i ma‘kūd-ı mezkûrda müteveffâ-yı mezbûrun zevce-i menkûha-i metrûkesi olmağla terekesine bi’l-verâse vâzı‘atü’l-yed olan umdetü’l-muhadderât Rabia Hanım ibnetü’l-merhûm Fındık Mehmed Paşa tarafından husûs-ı âti’l-beyanda vekîl-i müsecceli olan Mehmed Bey b. Mehmed mahzarında üzerine da‘vâ ve takrîr-i kelâm edip müteveffâ-yı mezbûr İbrahim Efendi b. Muslı b. Abdullah zimmetinde yedinden müşterâ ve makbûz adedi beynimizde ma‘lûm mest ve pabuç ve çizme bahalarından ba‘de-külli’l-hesâb yüz otuz altı buçuk guruş hakkım olup hattâ müteveffâ-yı mezbûr hâl-i kemâl-i sıhhatinde meblağ-ı mezbûr cihet-i merkūmeden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim, suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden müteveffâ-yı mezbûrun etbâ‘ından Mehmed Efendi b. Hüseyin ve Ahmed Çelebi b. İbrahim li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffâ-yı mezbûr İbrahim Efendi b. Muslı b. Abdullah hâl-i kemâl-i sıhhatinde işbu müdde‘î-i mezbûra yedinden müşterâ ve makbûz adedi beynlerinde ma‘lûm mest ve pabuç ve çizme bahalarından ba‘de-külli’l-hesâb yüz otuz altı buçuk guruş zimmetinde vâcibü’l-edâ deyni olduğunu huzûrumuzda ikrâr ve bizi işhâd eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan el-Hâc Mehmed b. Ahmed ve Ahmed Çelebi b. Hasan ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fî-gurreti Cumâdelâhire sene 1143. Şuhûdü’l-hâl: İsmail Efendi b. el-Hâc Abdullah imam, Süleyman Çelebi b. Ahmed, Mustafa Ağa b. Abdullah, Süleyman Çelebi b. Abdullah, Ahmed Çelebi b. Hasan