Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 97 Hüküm no: 61 Orijinal metin no: [11b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Veznedar Mehmed Çavuş’un varislerinden Ali Bey’in sulh bedeli karşılığı terekeden hakkını aldığı Husûs-ı âti’l-beyanın mahâllinde ketb ü tahrîri için savb-ı şer‘-i enverden Mevlânâ Hâfız Mehmed Efendi b. Osman irsâl olunup ol dahi mahmiye-i İstanbul’da Davud Paşa mahâllesinde sâkin iken bundan akdem vefât eden Veznedâr Mehmed Çavuş Ağa b. Ali’nin menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun verâseti zevce-i menkûha-i metrûkesi Hadîce Hatun bt. el-Hâc Mustafa ile mukarrun-leh bi’n-neseb cihetinden vârisi Ali Bey b. Hasan’a münhasıra olduğu şer‘an zâhir ve mütehakkık oldukdan sonra mezbûr Ali Bey meclis-i ma‘kūd-ı mezkûrda tereke-i müteveffâ-yı mezbûra bi’l-verâse vâzı‘atü’l-yed olup zâtı ta‘rîf-i şer‘i ile mu‘arrefe olan hâfızatü’l-kitâb mezbûre Hadîce Hatun mahzarında ikrâr ve takrîr-i kelâm edip mûrisimiz müteveffâ-yı mezbûrun terekesinden hisse-i ırsiyem mukābelesinde şerâit-i sıhhat-i sulhu hâvî ve mevâni‘den ârî bi-tarîkı’t-tehârüci’ş-şer‘î nukūd-ı terekeden hissemden ezyed yüz elli guruş üzerine mezbûre Hadîce Hatun ile beni inşâ-i akd-i sulh eylediklerinde ben dahi ber-vech-i muharrer sulh-ı mezkûru kabûl ve bedel-i sulh olan meblağ-ı mezbûr yüz elli guruşu mezbûre Hadîce Hatun yedinden bi’t-tamâm ve’l-kemâl alıp kabz eyledim, min-ba‘d mûrisim müteveffâ-yı mezbûrun terekesine müte‘allıka âmme-i de‘âvî ve mutâlebât ve kâffe-i eymân ve muhâsamâtdan mezbûre Hadîce Hatun’un zimmetini ibrâ-i âmm-ı kātı‘ü’n-nizâ‘la ibrâ ve ıskāt eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr, ba‘dehû ma‘an irsâl olunan Mehmed Çelebi b. el-Hâc Mustafa ve el-Hâc İbrahim b. Hüseyin ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fî 18 min-şehri Rebî‘ülâhir sene 1143. Şuhûdü’l-hâl: İbrahim Efendi b. Mehmed, Hasan Efendi b. Osman, Mehmed Çavuş Ağa b. İbrahim, el-Hâc Mehmed b. el-Hâc Ahmed, el-Hâc Abdullah b. Esad, İbrahim Ağa b. Ali, Mehmed Çelebi b. Mustafa, Abdülkadir b. Mustafa, Mustafa b. Hüseyin, Mustafa b. İbrahim, Mustafa Çelebi b. Mehmed