Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 98 Hüküm no: 62 Orijinal metin no: [11b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mustafa Ağa’nın Haçador’a olan borcunun ödenerek rehin verilen eşyaların geri alındığı Husûs-ı âti’l-beyanın mahâllinde ketb ü tahrîri için savb-ı şer‘-i enverden Mevlânâ Mehmed Efendi b. Osman irsâl olunup ol dahi mahmiye-i İstanbul’da Sekbânbaşı Yakub Ağa mahâllesinde sâkin iken bundan akdem vefât eden camuscu? el-Hâc Mustafa Ağa b. Abdullah’ın menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun sulbî sagīr oğlu Mehmed’in tesviye-i umûruna kıbel-i şer‘den mansûbe vasiyyesi ve vâlidesi olup zâtı ta‘rîf-i şer‘î ile mu‘arrefe olan Meryem Hatun bt. Abdullah ile müteveffâ-yı mezbûrun zevce-i menkûha-i metrûkesi olup zâtı kezâlik ta‘rîf-i şer‘î ile mu‘arrefe olan Âişe Hatun bt. Abdullah meclis-i ma‘kūd-ı mezkûrda bâ‘isü’s-sifr Türkmânoğlu Haçador v. Markon nâm zimmî mahzarında her biri bi’l-asâle ve bi’l-vesâye ikrâr ve takrîr-i kelâm edip mesfûr Haçador zimmînin müteveffâ-yı mezbûr zimmetinde olup bâ-hüccet-i şer‘iyye müsbet olan yüz altmış guruş hakkını mesfûr Haçador’a def‘ ve teslîm edip meblağ-ı mezbûr mukābelesinde rehin olan işbu müfredât defteri mûcebince bir keremsûd biniş karsak kürk ve bir yeşil çukaya kaplı boğaz kürk ve bir beyaz keremsûda kaplı köhne kafa kürk ve bir yeşil hilâlî kaplı sincab kürk ve bir kuzu çuka yağmurluk ve bir sof kerrâke ve bir sarı çuka dolama ve bir sırmalı aba kerrâke ve bir hilâlî üzengi ve bir sîmli vezne ma‘a palaska ve bir yaldızlı bakır kemer raht ma‘a başlık ve bir kuzu sâye biniş ve yeşil çuka dolamayı mesfûr Haçador zimmî bize def‘ u teslîm ve biz dahi bi’l-asâle ve bi’l-vesâye defter-i kassâma idhâl için yedinden tamâmen ahz u kabz eyledik, ba‘de’l-yevm mesfûr Haçador zimmî zimmetinde rehin-i mezkûrdan bir nesne bâkī kalmadı dediklerinde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan Hasan Çelebi b. Mehmed ve Ahmed Çelebi b. Halil ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fî 18 min-Cumâdelûlâ sene 1143. Şuhûdü’l-hâl: Mustafa Ağa b. Ali mübâşir, Mustafa Çelebi b. İsmail, es-Seyyid Hüseyin Çelebi b. Halil, İsmail Beşe b. İbrahim