Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 99 Hüküm no: 64 Orijinal metin no: [11b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Ağa’nın kızı Ayşe’nin vasisi üzerine nazır tayin edilen Mustafa Çelebi’nin hesap defteri Mahmiye-i İstanbul’da Akbıyık mahâllesinde sâkin iken bundan akdem vefât eden İbrahim Ağa b. Süleyman’ın sulbiye sagīre kızı Âişe’nin tesviye-i umûruna bâ-hüccet-i şer‘iyye vasiyy-i muhtârı el-Hâc Mehmed Çavuş b. el-Hâc Mehmed’in üzerine cânib-i şer‘den hasbî nâzır nasb olunan müteveffâ-yı mezbûrun li-eb er karındaşı oğlu Mustafa Çelebi iltimâsıyla sagīre-i mezbûrenin târîh-i vilâdeti olan işbu bin yüz kırk üç senesi Saferi’l-hayrın yirminci gününden sene-i mezbûre Cumâdelûlâ gāyetine gelince üç ay günde sagīre-i mezbûre Âişe’nin mâl-ı muntakilinden ve akārâtı icâresinden vasiyy-i mezbûrun makbûz ve masrûfunun görülen hesâbı defteridir ki ber-vech-i âtî zikr olunur. Fî-selhi Cumâdelûlâ sene selâse ve erba‘în ve mi’e ve elf. #&# Mahâlle-i mezbûrede vâki‘ vakıf kürkçü dükkânından ancak bir aylık icâre-i makbûza 240 akçe Ber-mûceb-i defter-i kassâm-ı askerî sagīre-i mezbûreye babası müteveffâ-yı mezbûrun terekesinden isâbet eden hisse 62.969 akçe Yine mahâlle-i mezbûrede vâki‘ vakıf attâr dükkânından kezâlik bir aylık kabz olunan icâre 210 akçe [12a] Ayasofya-i kebîr sûkunda vâki‘ vakıf kasab dükkânından kezâlik bir aylık kabz olunan icâre 420 akçe Mısır Çarşısı’nda vâki‘ vakıf attâr dükkânından kezâlik bir aylık kabz olunan icâre 360 akçe Atpazarı’nda vâki‘ vakıf bir ahır ve beş kıt‘a semerci dükkânları ve mûytâb kârhânesinde iki aylık kabz olunan icâre 2.820 akçe Bezzâzistân kurbünde bir kıt‘a kazzâz dükkânından kezâlik bir aylık icâre-i makbûza 360 akçe Yine bezzâzistân kurbünde bir kıt‘a bezzâz dükkânından kezâlik bir aylık icâre-i makbûza 360 akçe Arslanhâne kurbünde ulyâsı terzi dükkânı ve vustâsı attâr dükkânı ve süflâsı izbeden kezâlik bir aylık icâre-i makbûza 420 akçe Yekûn: 68.159 akçe Minhe’l-[ihrâcât] Zikr olunan kürkçü ve attâr dükkânlarının bir aylık vakıf icârelerine verilen 30 akçe Kezâlik kasab dükkânının bir aylık vakıf icâresine verilen 60 akçe Mısır Çarşısı’ndaki attâr dükkânının kezâlik bir aylık vakıf icâresine verilen 30 akçe Atpazarı’ndaki akārın iki aylık vakıf icâresine verilen 240 akçe Kezâlik kazzâz dükkânının bir aylık vakıf icâresine verilen 30 akçe Kezâlik bezzâz dükkânının bir aylık vakıf icâresine verilen 20 akçe Arslanhâne kurbündeki akārın kezâlik bir aylık vakıf icâresine verilen 15 akçe Mahâlle-i mezbûrede vakıf menzilin güzeşte on aylık vakıf icâresine verilen 480 akçe Sagīre-i mezbûrenin vilâdetinde ve târîh-i kitâba gelince iktizâ eden masârıf-ı lâzımesine kadr-ı ma‘rûf olmak üzere masrûf 6.000 akçe Zikri mürûr eden menzil ve üç kıt‘a dükkân Harameyn Vakfı’ndan olmağla müteveffâ-yı mezbûrun fevtinden sonra mütevellîsi mahlûl olmak üzere âhara icâr edip sagīre-i mezbûre tevellüd ettikden sonra vasiyy-i mezbûr mütevellîsi murâfa‘a oldukda sagīreye intikāl-i âdî ile intikāline hükm olundukda berây-ı harc ve i‘lâm ve hücec ve sâir masârıfa masrûf ve mübâşiriye 6.300 akçe Zikri mürûr eden menzil ve üç hisse dükkânın intikāl temessükü harcı için masrûf 2.040 akçe Mârrü’z-zikr kasab dükkânının intikāl temessükü harcına masrûf dahi 840 akçe İki kıt‘a dükkân intikāl temessükü için Hasan Paşa Vakfı mütevellîsine verilen harc 1.500 akçe Ayasofya-i kebîr Vakfı’ndan üç hisse dükkân için intikāl harcına masrûf-ı vasî 3.380 akçe Mısır Çarşısı’ndaki attâr dükkânı nizâ‘ı için berây-ı harc ve i‘lâm ve ücret-i mübâşir ve masârıf-ı sâire masrûf 2.760 akçe Mezbûr attâr dükkânının intikāl temessükü harcı için verilen 940 akçe Akār-ı mezkûrun güzeşte vakıf icârelerine ve harc intikāl ve iktizâ eden masârıfa masrûf 4.121 akçe Vakıf menzil-i mezbûrun ta‘mîr ü termîmine masrûf 2.150 akçe Harc-ı defter-i muhâsebe 1.200 akçe Kâtibiye ve hüddâmiye ve ihzâriye 500 akçe Kaydiye 60 akçe Yekûn: 32.696 akçe Sahhu[‘l-bâkī]: 35.463 akçe Mablağ-ı bâkī-i mezkûr otuz beş bin dört yüz altmış üç akçenin yirmi bin iki yüz yetmiş iki akçesi sagīre-i mezbûre Âişe’nin vâlidesi Rukıye Hatun zimmetinde ve on beş bin yüz doksan bir akçesi vasiyy-i mezbûr yedinde olup bu mahâlle şerh verildi.