Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 102 Hüküm no: 66 Orijinal metin no: [12b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeynep Hatun’un vefatıyla terekesinin Süleyman ve diğer Süleyman’a kaldığı Mahmiye-i İstanbul’da Sahâf Süleyman mahâllesinde sâkine iken bundan akdem vefât eden Zeyneb Hatun bt. Abdullah’ın ber-vech-i âtî li-ebeveyn ammi oğlu ve usûbet-i nesebiye cihetinden vârisi olduğunu iddi‘â eden hâfızü’l-kitâb Süleyman b. Abdullah meclis-i şer‘-i hatîr-i lâzımü’t-tevkīrde müteveffât-ı mezbûrenin üzerine velî olmağla terekesine bi’l-verâse vaz‘-ı yed eden diğer Süleyman b. Abdullah mahzarında üzerine da‘vâ ve takrîr-i kelâm edip müteveffât-ı mezbûre Zeyneb’in babası Mamoka ile benim babam Fokaba li-ebeveyn karındaşlar olup babaları ismi Danone ve dedeleri ismi Mamkaca anaları ismi Nandire v. Zersime maskat-ı re’sleri Gürcistan diyârında Somanat karyesidir, müteveffât-ı merkūmenin verâseti zevc-i metrûkü mezbûr Süleyman ile usûbet-i nesebiye cihetinden bana münhasıra olup bizden gayrı vâris ve terekesine âhar müstahak yoğ iken mezbûr Süleyman hisse-i ırsiyemi bana vermede ta‘allül eder, suâl olunsun dedikde gıbbe’s-suâl mezbûr Süleyman cevâbında tereke-i müteveffât-ı mezbûreye bi’l-verâse vaz‘-ı yedini ikrâr lâkin müdde‘î-i mezbûrun ber-vech-i muharrer müdde‘âsını inkâr edicek müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden mahrûse-i Galata muzâfâtından kasaba-i Kasım Paşa’da Surûrî mahâllesinde sâkin Ali b. Abdullah ve Küçük Piyale Paşa’da sâkin Süleyman b. Abdullah li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffât-ı mezbûre Zeyneb’in babası Mamoka işbu müdde‘î-i mezbûr Süleyman’ın babası Fokaba ile li-ebeveyn karındaşlar olup babaları ismi Danone ve dedeleri ismi Mamkaca anaları ismi Nandire v. Zersime ve maskat-ı re’sleri diyâr-ı Gürcistan’da Somanat karyesidir, müteveffât-ı mezbûrenin verâseti mezbûr Süleyman ile usûbet-i nesebiye cihetinden müdde‘î-i mezbûr diğer Süleyman’a münhasıra olup bunlardan gayrı vâris ve terekesine müstahakk-ı âhar olduğu ma‘lûmumuz değildir, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mâ-vaka‘a bi’t-taleb ketb olundu. Fî 29 Cumâdelûlâ sene 1143. Şuhûdü’l-hâl: Süleyman Ağa b. Abdurrahman, Mustafa Çelebi b. el-Hâc Hasan, el-Hâc İbrahim b. Hüseyin, Salih Çelebi b. Halil, Ahmed Çelebi b. Hasan