Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 103 Hüküm no: 67 Orijinal metin no: [12b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çelebi’nin vefat eden Mustafa Ağa’nın varislerinden olduğu Husûs-ı âti’l-beyanın mahâllinde istimâ‘ ve tahrîri için savb-ı şer‘-i enverden Mevlânâ el-Hâc Feyzullah Efendi b. el-merhûm Mehmed Efendi irsâl olunup ol dahi mahmiye-i İstanbul’da Peykhâne’de Mehmed Ağa’nın odasına varıp zeyl-i vesîkada muharrerü’l-esâmi Müslimîn huzûrlarında akd-i meclis-i şer‘-i şerîf ettikde zikr olunan Peykhâne’de sâkin iken bundan akdem vefât eden Mustafa Ağa b. Ahmed’in ber-vech-i âtî usûbet-i nesebiye cihetinden vârisi olduğunu iddi‘â eden işbu bâ‘isü’l-kitâb Mustafa Çelebi b. Ahmed meclis-i ma‘kūd-ı mezkûrda müteveffâ-yı mezbûrun vesâyetini tenfîze bâ-hüccet-i şer‘iyye vasiyy-i muhtârı olmağla terekesine bi’l-vesâye vaz‘-ı yed eden Penek İbrahim Ağa b. Ömer mahzarında üzerine da‘vâ ve takrîr-i kelâm edip müteveffâ-yı mezbûr Mustafa Ağa’nın babası Binbaşı Ahmed Ağa ile benim babam Şâtırlar Kethüdâsı el-Hâc Mehmed Ağa li-ebeveyn er karındaşlar olup babaları ismi Mustafa ve dedeleri ismi Abdurrahman ve vâlideleri ismi Fâtıma bt. Ahmed ve maskat-ı re’sleri Filibe kazâsına tâbi‘ Karlova karyesinde olup müteveffâ-yı mezbûrun verâseti vilâyet-i Rumeli’nde Çırpan kazâsında sâkin li-ebeveyn kız karındaşı Âişe Hatun ile vilâyet-i mezbûrede Hasköy kasabasında sâkin li-üm kız karındaşı Hadîce bt. Mehmed’e ve usûbet-i nesebiye cihetinden bana ve zikr olunan Çırpan kasabasında sâkinler li-ebeveyn er karındaşlarım Ahmed ve el-Hâc Hüseyin nâm gāiblere münhasıra olup terekesine bizden gayrı vâris ve âhar müstahak olmamağla müteveffâ-yı terekesinden bana isâbet eden hisse-i ırsiyemi vasiyy-i mezbûrdan taleb eylediğimde edâdan imtinâ‘ eder, suâl olunup alıverilmesi matlûbumdur dedikde gıbbe’s-suâl vasiyy-i mezbûr cevâbında tereke-i müteveffâ-yı mezbûra ber-vech-i muharrer vaz‘-ı yedini ikrâr ve müdde‘î-i mezbûrun müdde‘âsını inkâr edicek müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden olup mahmiye-i mezbûrede Elvanzâde mahâllesi sükkânından eş-Şeyh es-Seyyid Ömer Efendi b. Mustafa ve İbrahim Efendi b. Hasan li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffâ-yı mezbûr Mustafa Ağa’nın babası Binbaşı Ahmed Ağa ile müdde‘î-i mezbûrun babası Şâtırlar Kethüdâsı el-Hâc Mehmed Ağa li-ebeveyn er karındaşlar olup babaları ismi Mustafa ve dedeleri ismi Abdurrahman ve vâlideleri ismi Fâtıma bt. Ahmed ve maskat-ı re’sleri Filibe kasabasına tâbi‘ Karlova karyesi olup müteveffâ-yı mezbûrun verâseti mârrü’z-zikr Hasköy kasabasında sâkine li-ebeveyn kız karındaşı Âişe ile zikr olunan Çırpan kasabasında sâkine li-üm kız karındaşı Hadîce bt. Mehmed’e ve usûbet-i nesebiye cihetinden işbu müdde‘î-i mezbûr ve li-ebeveyn er karındaşları el-Hâc Hüseyin ve Ahmed nâm gāiblere münhasıra olup bunlardan gayrı vâris ve âhar müstahak olduğu ma‘lûmumuz değildir, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr mahâllinde tahrîr ba‘dehû ma‘an mürsel İsmail Çelebi b. Ömer ve Mustafa b. Abdullah ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fî 25 min-Cumâdelûlâ sene 1143. Şuhûdü’l-hâl: Mehmed Ağa b. Ahmed, Mehmed Ağa b. Veliyüddin Hasan Ağa b. Ali, Ahmed Çelebi b. Mustafa, Mehmed b. Ahmed, İbrahim b. Ahmed