Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 106 Hüküm no: 69 Orijinal metin no: [13a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mustafa Ağa’nın varislerinden Ahmed ve Hatice’nin vekilleri marifetiyle terekeden haklarını aldıkları Kezâlik akd-i meclis-i şer‘-i şerîf ettikde zikr olunan Peykhâne’de sâkin iken bundan akdem vefât eden Penek Mustafa Ağa b. Ahmed’in verâseti vilâyet-i Rumeli’nde Çırpan kasabasında sâkine li-ebeveyn kız karındaşı Âişe Hatun ile vilâyet-i mezbûrede Hasköy kasabasında sâkine li-üm kız karındaşı Hadîce bt. Mehmed’e ve usûbet-i nesebiye cihetinden li-ebeveyn ammi oğlu Mustafa’ya ve âhar li-ebeveyn ammi oğulları el-Hâc Hüseyin ve Ahmed evlâd-ı Mehmed nâm gāiblere münhasıra ve tashîh-i meselesi on sekiz sehmden olup sihâm-ı mezbûrenin dokuz sehmi mezbûre Âişe Hatun ve üç sehmi mezbûre Hadîce’ye ve bâkī ikişer sehmi mezbûrûn Mustafa ve el-Hâc Hüseyin ve Ahmed’e isâbeti tahakkukundan sonra zâtı ta‘rîf-i şer‘î ile mu‘arrefe olan mezbûre Hadîce Hatun ile mezbûr Ahmed Çelebi taraflarından ber-vech-i âtî vekâlet iddi‘â eden işbu bâ‘isü’l-kitâb eş-Şeyh İbrahim Efendi b. Hasan meclis-i ma‘kūd-ı mezkûrda müteveffâ-yı mezbûrun vesâyâsını tenfîze bâ-hüccet-i şer‘iyye vasiyy-i muhtârı olmağla terekesine bi’l-vesâye vaz‘-ı yed eden Penek İbrahim Ağa b. Ömer mahzarında üzerine da‘vâ ve takrîr-i kelâm edip gāibân-ı mezbûrân Ahmed ve Hadîce mûrisleri müteveffâ-yı mezbûrun terekesinden kendülere isâbet eden hisse-i ırsiyelerini vasiyy-i mezbûrdan ve sâir vâzı‘ü’l-yed olanlardan taleb ü da‘vâ ve ahz u kabz ve ibrâ ve kendülere îsâle ve bunlar mutavakkıf olduğu umûrun küllîsine taraflarından beni huzûr-ı Müslimînde vekîl ve nâib-i menâb nasb u ta‘yîn edip ben dahi ber-vech-i muharrer vekâlet-i mezbûreyi kabûl eylediğimden sonra müteveffâ-yı mezbûrun terekesinden müvekkilân-ı mezbûrâna isâbet eden hisse-i ırsiyelerini vasiyy-i mezbûrdan taleb eylediğimde bana edâdan imtinâ‘ eder suâl olunup alıverilmesi matlûbumdur dedikde gıbbe’s-suâl vasiyy-i mezbûr cevâbında tereke-i müteveffâ-yı mezbûra bi’l-vesâye vaz‘-ı yedini ikrâr ve müdde‘î-i mezbûrun ber-vech-i muharrer vekâletini inkâr edicek müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden olup mahmiye-i mezbûrede Bağçekapısı kurbünde sâkinler es-Seyyid Ömer Efendi b. Mustafa ve mezbûr Mustafa Çelebi b. Mehmed li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka şahsı rü’yetimiz ile ma‘lûmumuz olan mezbûre Hadîce Hatun ile mezbûr Ahmed Çelebi mûrisleri Bey Mustafa Ağa’nın terekesinden kendülere isâbet eden hisse-i ırsiyelerini vasiyy-i mezbûrdan ve sâir vâzı‘ü’l-yed olanlardan taleb ü da‘vâ ve ahz u kabz ve ibrâ ve kendülere îsâle ve bunlar mutavakkıf olduğu umûrun küllîsine taraflarından işbu müdde‘î-i mezbûr eş-Şeyh İbrahim huzûrumuzda vekîl ve nâib-i menâb nasb u ta‘yîn eylediler, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vekîl-i mezbûr eş-Şeyh İbrahim Efendi yine meclis-i mezkûrda vasiyy-i mezbûr mahzarında bi’l-vekâle ikrâr ve takrîr-i kelâm edip müvekkilân-ı mezbûrân Ahmed Çelebi ve Hadîce Hatun mûrisleri müteveffâ-yı mezbûrun terekesinden isâbet eden ber-mûceb-i defter-i kassâm-ı askerî tashîh-i mezkûr üzere cem‘an iki bin yedi yüz doksan dört akçeyi terekeden olmak üzere vasiyy-i mezbûr bana def‘ ve teslîm ben dahi yedinden vekâletim hasebiyle bi-kadri’l-hısas tamâmen alıp kabz eyledim min-ba‘d meblağ-ı mecmû‘-ı mezkûr iki bin yedi yüz doksan dört akçeden vasiyy-i mezbûr yedinde ve zimmetinde bir akçe ve bir habbe bâkī kalmayıp müteveffâ-yı mezbûrun terekesine müte‘allıka âmme-i mîrâs da‘vâsından vasiyy-i mezbûrun bi’l-vekâle zimmetini ibrâ ve ıskāt eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde ilâ âhırihî Fi’t-târîhi’l-mezbûr li-seneti’l-merkūme. Şuhûdü’s-sâbıkūn