Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 107 Hüküm no: 70 Orijinal metin no: [13a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Efendi’nin vefat etmeden önce Mehmed Efendi’yi vasi tayin ettiği Husûs-ı âti’l-beyanın mahâllinde istimâ‘ ve tahrîri için savb-ı şer‘-i enverden mezûnen Mevlânâ el-Hâc Mustafa Efendi b. Abdurrahman Efendi irsâl olunup ol dahi mahmiye-i İstanbul’da hadîka-i hâssa-i şehriyârî bostanîleri mütekā‘idlerinden olup kasaba-i Beşiktaş’da Tekerlek Mustafa Çelebi mahâllesinde sâkin iken bundan akdem vefât eden ve Dolmabağçe imamı Süleyman Efendi b. Mahmud Efendi’nin menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun ber-vech-i âtî vasiyy-i muhtârı olduğunu iddi‘â eden bâ‘isü’l-kitâb Mehmed Efendi b. Halil Efendi meclis-i ma‘kūd-ı mezkûrda müteveffâ-yı mezbûrun zevce-i menkûha-i metrûkesi olmağla terekesine bi’l-verâse vâzı‘ü’l-yed ve zâtı ta‘rîf-i şer‘î ile mu‘arrefe olan Âişe Hatun bt. Abdullah mahzarında üzerine da‘vâ ve takrîr-i kelâm edip müteveffâ-yı mezbûr Süleyman Efendi b. Mahmud Efendi b. Osman hâl-i marazında fevtinden üç gün mukaddem bi-emrillâhi te‘âlâ vefât eylediğimde cemî‘ terekem ve zimem-i nâsda olan hukūkum ahz u kabz olunup vech-i mesnûn üzere levâzım-ı techîz ve tekfînim görülüp düyûn-ı müsbetem kazâ olundukdan sonra bâkī kalan terekenin sülüsünden on guruşu ıskāt-ı salâtım için fukarâya tasadduk oluna ve on guruşu ile eyyâm-ı mübârekede tabh-ı ta‘âm ve it‘âm-ı sülehâ ve fukarâ oluna ve on guruşu ile ta‘mîr-i kabrim oluna deyü vasiyet edip tenfîzine ve sulbî sagīr oğulları Mahmud ve Mehmed’in tesviye-i emrlerine huzûr-ı Müslimînde beni vasiyy-i muhtâr nasb u ta‘yîn ettikde ben dahi muvâcehesinde ba‘de’l-kabûl musırran-aleyhâ fevt oldukda terekesinin sülüsü meblağ-ı mûsâ bih-i mezkûra müsâ‘id olmağla tenfîz-i vesâyâ murâd eylediğimde mezbûre Âişe Hatun mâni‘a olur suâl olunsun dedikde gıbbe’s-suâl ve’l-inkâr müdde‘î-i mezbûrdan ber-vech-i muharrer müdde‘âsına beyyine taleb olunup istişhâd olunduklarında fi’l-hakīka müteveffâ-yı mezbûr Süleyman Efendi b. Mahmud Efendi b. Osman hâl-i marazında fevtinden üç gün mukaddem bi-emrillâhi te‘âlâ vefât eylediğimde cemî‘ terekem ve zimem-i nâsda olan hukūkum ahz u kabz olunup vech-i mesnûn üzere levâzım-ı techîz ve tekfînim görülüp düyûn-ı müsbetem kazâ olundukdan sonra bâkī kalan terekemin sülüsünden on guruşu ıskāt-ı salâtım için fukarâya tasadduk oluna ve on guruşu ile eyyâm-ı mübârekede tabh-ı ta‘âm ve it‘âm-ı sülehâ ve fukarâ oluna ve on guruşu ile ta‘mîr-i kabrim oluna deyü vasiyet edip tenfîzine ve sulbî sagīr oğulları Mahmud ve Mehmed’in tesviye-i emrlerine huzûrumuzda işbu müdde‘î-i mezbûr Mehmed Efendi’yi vasiyy-i muhtâr nasb u ta‘yîn ettikde ol dahi muvâcehesinde ba‘de’l-kabûl musırran-aleyhâ fevt oldukda terekesinin sülüsü meblağ-ı mûsâ bih-i mezkûra müsâ‘iddir biz bu husûsa bu vech-i üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr mahâllinde tahrîr ve ma‘an irsâl olunan İbrahim Bey b. Mehmed ve İsmail Çelebi b. İbrahim ile meclis-i şer‘a gelip alâ-vuku‘ihî [13b] inhâ ve takrîr etmeğin mâ-vaka‘a bi’t-taleb ketb olundu. Fî-gurreti Cumâdelâhir li-sene selâse ve erba‘în ve mi’e ve elf. Şuhûdü’l-hâl: Mehmed Efendi b. Ahmed el-imâm, İsmail Efendi b. Mehmed el-müezzin, Mehmed Usta b. Ali, el-Hâc Mustafa b. Mehmed, İbrahim Bey b. Mehmed, İsmail Çelebi b. İbrahim