Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 122 Hüküm no: 84 Orijinal metin no: [16a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Odabaşı’nın terekesinin varisler arasında paylaştırılıp terekeden olan evin de Fatıma Hanım’a satıldığı Husûs-ı âti’l-beyanın mahâllinde ketb ü tahrîri için savb-ı şer‘-i enverden Mevlânâ Balizâde es-Seyyid Mustafa Efendi irsâl olunup ol dahi mahmiye-i İstanbul’da Çivizâde mahâllesinde Ali Odabaşı b. Ahmed’in menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde mahâlle-i mezbûrede sâkin iken bundan akdem vefât eden İvaz Beşe b. Abdullah’ın verâseti zevce-i menkûha-i metrûkesi Hanife Hatun bt. Hasan ile sulbî kebîr oğlu Hüseyin ve sulbiye kebîre kızları Hadîce Hatun ve Emine Hatun’a münhasıra olup ba‘dehû mezbûr Hüseyin dahi vefât edip verâseti vâlidesi mezbûre Hanife Hatun ile li-ebeveyn kız karındaşları mezbûretân Hadîce Hatun ve Emine Hatun’a ve li-üm karındaşı sagīr Hasan’a münhasıra olup ba‘dehû mezbûre Emine Hatun dahi vefât edip verâseti zevc-i metrûkü Mehmed beşe b. Hasan ile li-ebeveyn kız karındaşı mezbûre Hadîce Hatun’a ve vâlidesi mezbûre Hanife Hatun’a ve li-üm karındaşı sagīr-i mezbûr Hasan’a münhasıra ve tashîh-i meselesi bi-hükmi’l-münâsahati’ş-şer‘iyye yedi yüz altmış sekiz sehmden olup sihâm-ı mezbûrenin yüz beş sehmi mezbûr Mehmed Beşe’ye ve üç yüz seksen beş sehmi mezbûre Hadîce Hatun’a ve yüz seksen yedi sehmi vâlidesi mezbûre Hanife Hatun’a ve doksan bir sehmi li-üm karındaşı sagīr-i mezbûr Hasan’a isâbet eylediği şer‘an zâhir ve mütebeyyen oldukdan sonra sagīr-i mezbûrun babası ve velîsi ve tesviye-i umûruna vasiyy-i şer‘îsi mezbûr Ali Odabaşı vesâyeten ve mezbûre Hadîce Hatun tarafından husûs-ı âti’l-beyanda vekîl olduğu Mehmed Çelebi b. İbrahim ve es-Seyyid Süleyman Çelebi b. es-Seyyid Ahmed şehâdetleriyle şer‘an sâbit ve sübût-ı vekâletine hükm olunan İsmail Çelebi b. Hasan vekâletine ve mezbûr Mehmed Beşe ile zât-ı şâhidân-ı mezbûrân ta‘rîfleriyle mu‘arrefe olan mezbûre Hanife Hatun asâleten meclis-i ma‘kūd-ı mezbûrda işbu sâhibü’l-kitâb fahrü’l-muhadderât Fâtıma Hanım ibneti’l-merhûm şeyhülislâm-ı sâbık Ali Efendi mahzarında her biri bi’l-asâle ve bi’l-vesâye ve bi’l-vekâle ikrâr ve takrîr-i kelâm edip müteveffâ-yı evvel-i mezbûrun ile’l-vefât yedinde mülk ve hakkı olup mahâlle-i mezbûrede vâki‘ etrâf-ı erba‘ası Mustafa Çelebi veresesi mülkü ve Âişe Hatun menzili ve mezbûre Hanife Hatun mülkü ve mahâlle-i mezbûre imamına meşrûta arsa-i hâliye ve tarîk-i âm ile mahdûd fevkānî üç bâb oda ve dehliz ve tahta-bend ve kenîf ve ahır ve havluyu müştemil mülk menzil bi’l-izni’ş-şer‘î Münâdî Mustafa Çelebi b. Ahmed yediyle iki ay mikdârı sûk-ı sultânî ve mecma‘-ı nâs olan mahâllerde nidâ ve müzâyede olunup rağabât-ı nâs bi’l-külliye münkaziye oldukdan sonra mezbûre Fâtıma Hanım üzerinde yüz kırk beş guruşda karâr edip ziyâde ile tâlib-i âhar zuhûr etmeyip [16b] ve meblağ-ı mezbûr menzil-i mezbûrun el-yevm semen-i misli idiği zeyl-i kitâbda muharrerü’l-esâmi Müslimîn haberleriyle lede’ş-şer‘i’l-enver zâhir ve mukarrer olmağın hudûd-ı mezkûru ile mahdûd olan menzili bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile mezbûre Fâtıma Hanım’a meblağ-ı mezbûr yüz kırk beş guruşa bey‘ ve temlîk ve teslîm edip ol dahi ber-vech-i muharrer iştirâ ve temellük ve tesellüm ve kabz ve kabûl eyledikden sonra semeni olan meblağ-ı mezbûr yüz kırk beş guruşa asâlet ve vekâlet ve vesâyetimiz hasebiyle mezbûre Fâtıma Hanım yedinden bi-kadri’l-hısas tamâmen alıp kabz eyledik ba‘de’l-yevm menzil-i mahdûd-ı mezkûr mezbûre Fâtıma Hanım’ın mülk-i müşterâsı olmuşdur, keyfe mâ teşâ’ ve tehtâr mutasarrıfa olsun dediklerinde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan Salih Çelebi b. Halil ve Abdullah b. Hasan ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fî 5 min-Cumâdelâhire sene 1143. Şuhûdü’l-hâl: Hüseyin Efendi b. Hasan el-imâm, Abbas Ağa b. Ahmed, Mehmed Ağa b. el-Hâc Hasan, el-Hâc Ahmed b. Mehmed, İbrahim Beşe b. Süleyman, Mehmed Beşe b. İbrahim, Osman Beşe b. Mustafa